Rossiyaning "Zenit" klubi futbolchisi Malkom karantin paytida rus tiligini o‘rganish bilan ovora ekanligini aytib o‘tdi.

"Rossiya chempionati ham to‘xtatildi. Bizga ehtiyot bo‘lish va uydan chiqmaslik tavsiya etildi. Ba’zi joylarga borish esa umuman taqiqlandi.

Klubdan ko‘rsatmalar oldim va ular asosida mashq olib boryapman. Oilam va do‘stlarim bilan videoaloqa orqali gaplashyapman. Bo‘sh qoldim deguncha rus tilini o‘rganishga harakat qilyapman", - Malkomning so‘zlaridan iqtibos keltirmoqda Meu Timao.

Malkom "Zenit" klubiga 2019 yilning yozida "Barselona" klubidan 40 million yevro evaziga ko‘chib o‘tgandi.

Joriy mavsumda 23 yoshli hujumchi oltita uchrashuvda maydonga tushdi va bitta gol urish bilan bir qatorda, bitta golli pasni amalga oshirdi.