«Real» klubi ham futbolchilarning maoshlarini qisqartirish masalasini ko‘rib chiqishni boshladi. Bu haqda "El Pais" nashri klubga yaqin manbalarga asoslanib xabar tarqatdi. Qisqartirish "Qirollik klubi"ning futbol va basketbol jamoalariga tegishli bo‘ladi.

Karantinning ilk kunlarida «Real» prezidenti Florentino Peres jamoa sardori Serxio Ramos bilan gaplashib, maoshlar qisqartirilmasligini ma’lum qilgan edi. Bu paytda rahbariyat La liga va Chempionlar ligasi mavsum davom ettirilishiga ishonayotgan edi.

Bundan tashqari, pandemiyaning ilk kunlarida «Real»ning moliyaviy ahvoli «Barselona»nikiga nisbatan ancha mustahkam edi. Moliyaviy hisobotga ko‘ra, 2019 yil yakunida madridliklar hisob-raqamida 156 million yevro qoldiq bor edi. «Real»ning sof qarzi 27 mln yevroni tashkil qildi. «Barselona» esa 217 million yevro miqdorida qarzga ega.

"Qaymoqranglilar" ushbu mavsumda uchrashuvlarni o‘tkazishdan 161,3 mln yevro, teletranslyasiyalarni sotishdan 179,8 mln yevro daromad olishni rejalashtirgan edi. Tabiiyki, jamoa zarar ko‘radi.

«Real» hali maoshlarni qisqartirish sxemasini ishlab chiqqani yo‘q. Tartib ishlab chiqilgandan keyin rahbariyat o‘yinchilar bilan bu borada muzokara olib boradi. Shuningdek, "Qirollik klubi" La liganing barcha klublari o‘yinchilar maoshini qisqartirishini istamoqda.