«Реал» клуби ҳам футболчиларнинг маошларини қисқартириш масаласини кўриб чиқишни бошлади. Бу ҳақда "El Pais" нашри клубга яқин манбаларга асосланиб хабар тарқатди. Қисқартириш "Қироллик клуби"нинг футбол ва баскетбол жамоаларига тегишли бўлади.

Карантиннинг илк кунларида «Реал» президенти Флорентино Перес жамоа сардори Серхио Рамос билан гаплашиб, маошлар қисқартирилмаслигини маълум қилган эди. Бу пайтда раҳбарият Ла лига ва Чемпионлар лигаси мавсум давом эттирилишига ишонаётган эди.

Бундан ташқари, пандемиянинг илк кунларида «Реал»нинг молиявий аҳволи «Барселона»никига нисбатан анча мустаҳкам эди. Молиявий ҳисоботга кўра, 2019 йил якунида мадридликлар ҳисоб-рақамида 156 миллион евро қолдиқ бор эди. «Реал»нинг соф қарзи 27 млн еврони ташкил қилди. «Барселона» эса 217 миллион евро миқдорида қарзга эга.

"Қаймоқранглилар" ушбу мавсумда учрашувларни ўтказишдан 161,3 млн евро, телетрансляцияларни сотишдан 179,8 млн евро даромад олишни режалаштирган эди. Табиийки, жамоа зарар кўради.

«Реал» ҳали маошларни қисқартириш схемасини ишлаб чиққани йўқ. Тартиб ишлаб чиқилгандан кейин раҳбарият ўйинчилар билан бу борада музокара олиб боради. Шунингдек, "Қироллик клуби" Ла лиганинг барча клублари ўйинчилар маошини қисқартиришини истамоқда.