Sensasiyalar davom etadi. Yettinchi aprel, navbat "Deportivo"ga. La Korunyadagi "Riasor" o‘yingohida kechgan bahsda ispanlarning umidi tugab bo‘lgandi. Chunki "Milan" uyida bir hafta oldin "Depor"ni yer tishlatgan, 4:1 hisobi qayd etilgan edi. 4:1. Hazil natija emas. Gollarni Kaka - ikki marta, Shevchenko va Pirlo yo‘llagandi. Birgina Pandianining javob goli ko‘p narsa bildirmasdi. Ammo ko‘p narsa bo‘lib chiqdi o‘sha gol.

Ma’lumot sifatida aytamiz, "Milan" o‘sha mavsum rasmiy chempion sanalardi. "Deportivo" garchi o‘sha yillari tarkibi yoqimtoy o‘yinchilardan tashkil topgan bo‘lsa-da, quturgan "Milan" bilan solishtirib bo‘lmasdi. Bir kun oldin "Real" va "Arsenal" turnirni tark etgani Karlo Anchelotti shogirdlariga tasodif bo‘lib tuyuldi. Shu bois, "Riasor"dagi harakatlardan xotirjamlik sezilib turardi. Beshinchi daqiqadayoq Pandiani hisobni ochgach, Italiya superklubi o‘zini yig‘ib oldi. Hujumlar uyushtirdi, biroq baribir natija aldab qo‘ygani sezilardi. Valeron 35-daqiqa o‘tayotganda hisobni o‘zgartirdi -2:0. Lukening tanaffusga chiqish oldi 3-golni yo‘llashi bu kecha "Milan" ahvolotiga yaxshi izoh edi.

Bir bo‘limda uchta gol o‘tkazib yuborish odatini ushbu klub keyingi mavsum – "Liverpul" bilan finalda ham namoyish etganidan xulosa qilsak, Anchelotti yigitlari katta hisobli natijaga tayyor emas ekan.

Shu hisobning o‘zi "Deportivo"ga yetarli edi. Ikkinchi bo‘limda natijani yanada mustahkamlash uchun Fran to‘rtinchi golni ham urib qo‘ydi. Tamom. Ertak davom etadi. "Deportivo" yarim finalda! To‘g‘ri, Xavyer Irureta shogirdlari finalga bora olishmadi, ammo "Milan"ni turnirdan chiqarib yuborishlarining o‘zi bir mavsumga yetarli sensasiya edi.

Xayrulla Hamidov.