"Energetik-BGU" hujumchisi Jasur Yaxshiboyev Belarus chempionatining ushbu mavsumidagi yulduz futbolchilardan biri bo‘lib turibdi. U dastlabki 3ta o‘yinda maydonga tushib, 3ta gol urdi va bitta golga uzatma berdi.

O‘zbekiston futbol federasiyasi birinchi vise-prezidenti Ravshan Ermatov "Sputnik" muxbiri bilan suhbatda Yaxshiboyev haqida o‘z fikrlari bilan o‘rtoqlashdi.

"Yaxshiboyevning o‘yinlarini diqqat bilan kuzatib, uning muvaffaqiyatlaridan xursand bo‘lyapmiz. Albatta, o‘yinchi bilan aloqamiz bor. Chunki u O‘zbekiston milliy va olimpiya terma jamoasi a’zosi hisoblanadi. O‘zbek matbuoti uning faoliyatini internet orqali keng yoritib bormoqda. Sport saytlari va muxlislar uning o‘yinidan quvonishmoqda", — dedi Ermatov.

"U juda iqtidorli futbolchi. Shuning uchun terma jamoa murabbiylari unga hamisha ishonch bildirib kelishdi. U katta futbolda o‘zini ko‘rsata olishiga shubha yo‘q edi. U erishilgan yutuq bilan cheklanib qolmaydi. U olimpiya terma jamoasida o‘ynaganida uning o‘z ustida qanday ishlayotganini o‘zim ko‘rganman. O‘ylashimcha, u o‘z oldiga eng yuqori maqsadlarni qo‘yadi va orzusini amalga oshirish ustida ishlaydi. Nasib qilsa, Jasur Belarus chempionati orqali Yevropaning top-klublari safiga o‘tadi. Biz unga ishonamiz va umid qilamiz".

"Energetik-BGU" safida o‘zbekistonlik yana bir hujumchi Shahboz Umarov ham o‘z faoliyati boshladi. Ermatov ushbu futbolchi haqida o‘z fikrini bildirdi.

"Belarus chempionatida yana bir o‘yinchimiz bor. U hozircha Jasur kabi o‘zini yorqin ko‘rsata olmayapti. Lekin u ham tez orada ochilib ketishiga ishonamiz. Ular bir jamoada o‘ynab, bir-birini hamisha qo‘llab-quvvatlashadi. Menga kelgan xabarlarga ko‘ra, klub ham bizning o‘yinchilarni iliq qabul qilgan. Shu bois, ularning adaptasiya muddati juda yaxshi o‘tdi", — dedi O‘FA rahbari.