"Энергетик-БГУ" ҳужумчиси Жасур Яхшибоев Беларусь чемпионатининг ушбу мавсумидаги юлдуз футболчилардан бири бўлиб турибди. У дастлабки 3та ўйинда майдонга тушиб, 3та гол урди ва битта голга узатма берди.

Ўзбекистон футбол федерацияси биринчи вице-президенти Равшан Эрматов "Sputnik" мухбири билан суҳбатда Яхшибоев ҳақида ўз фикрлари билан ўртоқлашди.

"Яхшибоевнинг ўйинларини диққат билан кузатиб, унинг муваффақиятларидан хурсанд бўляпмиз. Албатта, ўйинчи билан алоқамиз бор. Чунки у Ўзбекистон миллий ва олимпия терма жамоаси аъзоси ҳисобланади. Ўзбек матбуоти унинг фаолиятини интернет орқали кенг ёритиб бормоқда. Спорт сайтлари ва мухлислар унинг ўйинидан қувонишмоқда", — деди Эрматов.

"У жуда иқтидорли футболчи. Шунинг учун терма жамоа мураббийлари унга ҳамиша ишонч билдириб келишди. У катта футболда ўзини кўрсата олишига шубҳа йўқ эди. У эришилган ютуқ билан чекланиб қолмайди. У олимпия терма жамоасида ўйнаганида унинг ўз устида қандай ишлаётганини ўзим кўрганман. Ўйлашимча, у ўз олдига энг юқори мақсадларни қўяди ва орзусини амалга ошириш устида ишлайди. Насиб қилса, Жасур Беларусь чемпионати орқали Европанинг топ-клублари сафига ўтади. Биз унга ишонамиз ва умид қиламиз".

"Энергетик-БГУ" сафида ўзбекистонлик яна бир ҳужумчи Шаҳбоз Умаров ҳам ўз фаолияти бошлади. Эрматов ушбу футболчи ҳақида ўз фикрини билдирди.

"Беларусь чемпионатида яна бир ўйинчимиз бор. У ҳозирча Жасур каби ўзини ёрқин кўрсата олмаяпти. Лекин у ҳам тез орада очилиб кетишига ишонамиз. Улар бир жамоада ўйнаб, бир-бирини ҳамиша қўллаб-қувватлашади. Менга келган хабарларга кўра, клуб ҳам бизнинг ўйинчиларни илиқ қабул қилган. Шу боис, уларнинг адаптация муддати жуда яхши ўтди", — деди ЎФА раҳбари.