Aytish kerak, karantin futbolchining qanchalar professional ekanligini ko‘rsatib beradi. Zero, professional o‘yinchi bunday vaziyatlarda jismoniy holatni bir maromda ushlab turish yo‘lini juda yaxshi biladi. Shunday futbolchilardan biri Anvar G‘ofurovning fikrlari bilan qiziqdik.

"Karantin vaqtida uyda o‘tirgan bo‘lsamda, zerikishni xis qilmayapman. Jismoniy holatimni bir maromda ushlab turish maqsadida shug‘ullanayapman. Uy sharoitidagi mashg‘ulotlarni to‘xtatayotganim yo‘q. Qolaversa, bo‘sh vaqtim bo‘ldi deguncha, kitob o‘qiyman yoki internet orqali o‘zimni qiziqtirgan mavzularni kuzataman, savollarimga javob izlayman. Albatta farzandlarim bilan birga kunimni mazmunli o‘tkazishga harakat qilaman.

Karantindan keyin avvalgi jismoniy holatga qaytish qanchalik oson? O‘ylaymanki, professional futbolchida bu borada hech qanday muammo bo‘lmaydi. Bunday vaziyatlarda hamma uy sharoitida shug‘ullanadi. Taxminimcha, shunday ham bo‘lyapti. Mavsumni davom ettirishga ruxsat berilganidan keyin jamoalarda jismoniy holat bo‘yicha muammo bo‘lmasa kerak.

Superliga davom ettirilishni boshlagach yo‘qotilgan kunlar hisobiga taqvim o‘zgaradi va tig‘ishlashadi. Buni plyus tomonlari ham bor. Xususan, barcha futbolchilarda o‘yin amaliyoti ko‘proq bo‘ladi. Murabbiylarda tarkib bo‘yicha rotasiya qilish imkoniyati paydo bo‘ladi. Zaxirada qolib ketayotgan o‘yinchilarda o‘zini ko‘rsatish imkoniyati yuqori bo‘ladi.

Karantin vaqtida hukumatimiz tomonidan aholiga turli talablar qo‘yilmoqda. Bu albatta sog‘lig‘imizni o‘ylab qo‘yilayotgan talablardir. Biz mazkur talablarni hurmat qilib, ularga qat’iy ravishda amal qilsak va bir musht bo‘lsak, koronavirusni yengamiz hamda hayotimizda yangi sahifa ochamiz", — dedi Anvar G‘ofurov.