Yaqinda Futbol tv kanali orqali 1999 yilgi “Lasio” – Milan” uchrashuvini sharhladim. Hisobni bilardim, biroq yoshligimning zavqli onlariga to‘g‘ri kelgan bahs 4:4 bilan tugagani uchun hujumkor o‘yin sifatida yodimda qolib ketgan ekan. Aslida himoya yurtida bunaqa hisob qayd etilishi g‘alati bo‘lsa ham.

O‘sha o‘yinni diqqat qilib kuzatdim va hisobning bu qadar yiriklashib ketishiga himoyachilarning yomon o‘yini sabab bo‘lganini angladim. Kamdan kam sodir bo‘ladigan hodisa, lekin o‘sha kuni shu ish voqe’ bo‘lgan ekan.

Ayniqsa, Roberto Ayyalaning xatosini ko‘rib hayron qoldim. Axir, u xotiramda himoya qo‘rg‘oni sifatida gavdalanib qolgan edi.
 
Bugun Roberto Ayyalaning tavallud topgan kuni. 47 yoshga kirdi. Uning nomini eshitganlar bo‘lsa, demakki, yaqin o‘tmish futbolidan ma’lumoti bor muxlislar. Hozirgi avlod bilmasligi ayb emas. Ular uchun bu tanishtiruv, eskilar uchun eslatuv.

1973 yili Argentinaning Parana shahrida tug‘ilgan Ayyala mamlakatning eng yaxshi himoyachilaridan hisoblanadi. 2004 yilgi Olimpiada chempioni. Terma jamoaning uzoq yillik sardori. 115 ta o‘yin o‘tkazgan. Bu ko‘rsatkich bo‘yicha u to‘rtinchi o‘rinda – Zanetti, Maskerano va Messidan keyin.

Sichqoncha laqabini 1974 yilgi mundial ishtirokchisi va g‘olibi Ruben Ayyaladan meros qilib olgan. Vaholanki, familiyadosh bo‘lsa-da, bu ikkisi bir-biriga umuman qarindosh emas.

"River Pleyt" tarbiyalanuvchisi. Italiyaning "Napoli"siga o‘tib, uch yildan so‘ng "Milan" tarkibiga qo‘shilgan. Asr oxirida milanliklar safida skudetto g‘olibi bo‘lgan. 2000 yili Valensiya klubi bilan shartnoma imzolab, rosmana klubini topadi. Ushbu klubda Roberto yetti yil faoliyat olib borgan va ikki marta Ispaniya chempioni bo‘lgan. Ikki marta YECHL finaliga chiqqan. UYEFA kubogini qo‘lga kiritgan va 2004 yili superkubok sohibiga aylangan.

Keyingi jamoalari – "Vilyarreal" va "Saragosa" Roberto Ayyala bilan eslanmaydi. Asosan "Valensiya" hamda terma jamoasi.

Uch mamlakat chempioni – Argentina, Italiya va Ispaniya. 2000 yili Yevropaning eng yaxshi himoyachisi bo‘lgan. E’tibor bering, bu natija Italiya himoyachilari dunyoni boshqarayotgan paytida qayd etilgan. Sababi, uning harakatlari italyancha futbolning, katinachchioning naq o‘zginasi edi. Hozirgacha "Valensiya" va Argentina terma jamoasi Roberto Ayyala kabi qo‘rqmas himoyachini sog‘inadi.

Xayrulla Hamidov.