18 aprel. Qiziq fakt. Faoliyatining asosiy qismini "Arsenal" klubida o‘tkazgan polshalik darvozabonlar – Lukash Fabianski va Voysex Shchesni bir kunda tug‘ilishgan. To‘g‘ri, yillarida farq bor. Fabianski 1985 yil, Shchesni 1990 yil.

Ikkisini ham ko‘pchilik "Legiya"dagi faoliyatidan tanishni boshlagan. Ikkisi ham boshqa klublariga qaraganda "Arsenal"da ko‘proq to‘p surishgan. Fabianski yetti yil londonliklarning muhim posboni bo‘lgan ersa, Voysex 8 yil davomida Londonning qizil tomoniga qo‘riqchi bo‘lgan.

Albatta, ular bir paytda ancha vaqt ushbu klub tarkibida harakat qilishgan, tabiiyki, bu jarayonda kimdir ikkinchi bo‘lishi kerak. Fabianski beqarorligi bilan dong taratgani uchun Voysexga qaraganda ancha kam o‘yinga tushgan. Shchesni ham Arsenal muxlislarida juda-aa-a iliq taassurot qoldirmaganu, vatandoshiga qaraganda ishonchliroq o‘yini bilan ajralib turgan.

Bugungi kunda Shchesni barqarorligi bilan dunyoning oldposbonlaridan. Arsenaldagi Shchesni emas.

Qiziq tomoni shuki, Voysexga doimo o‘zidan kattalar bilan kurashish taqdir qilingan edi. Polshada yaxshi darvozabonlar ko‘pligini hisobga olsak, terma jamoa darvozasiga da’vogarlik qilish ham mushkul. Shchesni shu kurashda Fabianski va boshqalarni yengib chiqdi. Hozirda terma jamoa unga topshirilgan.

Shuningdek, "Yuventus"ga kelar ekan, Buffondan keyin nafaqat Turin klubini, balki skuadro adzurraning-da kelajagi deb baholanayotgan Perin bilan kurashishi, ikkinchilikka da’vo qilishi zarur edi. Natija nima bo‘ldi: Hozirda Shchesni "Yuve"ning asosiy posboni, Buffon qaytib kelgach ham joyini bermadi.

Fabianski o‘zidan besh yosh kichik vatandoshi haqida shunday deydi: “Voysex doimo ulg‘aydi. To‘xtab qolmadi”.

To‘g‘ri ta’rif. Lukash o‘zidan o‘tganini o‘zi biladi. Bu ta’rif bilan aslida u o‘zining faoliyatiga ham baho bergan. Nuqta.

Xayrulla Hamidov.