Koronavirus pandemiyasi iqtisodiy jihatdan baquvvat klublarni ham o‘ylantirib qo‘ydi. Yillik daromadlari (757,3 million yevro) bo‘yicha jahonning ikkinchi klubi hisoblangan «Real» inqirozga uchramaslik uchun xarajatlarni qisqartirish haqida o‘ylay boshladi.

Aniq faktlarga to‘xtalib o‘tamiz.

1. «Real» ushbu mavsumda 822 mln yevro daromad olib, 741 mln yevro xarajat qilishni rejalashtirgan edi. Daromadlar 4ta toifaga bo‘lingan:

abonement va chiptalar — 161 mln yevro;
xalqaro musobaqalar va o‘rtoqlik o‘yinlari — 109 mln yevro;
TV-translyasiya huquqi — 180 mln yevro;
marketing — 371 mln yevro.

2. Savdo do‘konlari (yillik — 25 mln yevro) va muzey (yillik — 60 mln yevro) yopiq turgani uchun «Real» daromadlarni yo‘qota boshladi. Karantin bekor qilinganidan keyin odamlarning tashrifi yana boshlanadi, ammo stadionga muxlislar kiritilmaydi.

3. Ma’lumotlarga qaraganda «Real» o‘tgan mavsumda 26ta uy uchrashuvidan (chiptalar+taom va atributikalar savdosi) 145 million yevro ishlab topgan. O‘rtacha bitta o‘yinda — 5,6 mln yevro. Ushbu mavsumda jamoa kamida 6ta o‘yin o‘tkazishi kerak. Zarar — 34 mln yevro.

4. Bundan tashqari, klub abonementlarning to‘rtdan bir qismini muxlislarga qoplab berishi kerak — 54 million yevro.

5. Klub xarajatlarning bir qismini maoshlarni 10%ga qisqartirish orqali qoplaydi — 45 mln yevro.

6. Xarajatlarni kamaytarishning yana bir yo‘li — jamoa yuqori maosh oladigan futbolchilar bilan xayrlashishi kerak. «Real» bu orqali maoshlar bilan xarajatni 80 mln yevroga kamaytirmoqchi. Buning uchun klub Beyl (yillik maoshi — 30 mln yevro), Xames (18 mln), Lukas Vaskes va Mariano (8 million yevrodan)ni transferga qo‘ydi.

7. Modrich (16 mln), Marselo (13) va Nacho (8) ko‘proq o‘yin amaliyotiga ega bo‘lishni istasalar, klub ularni ushlab o‘tirmaydi — sotib yuboradi. Shuningdek, «Bavariya» Odriosolani sotib olishiga madridliklar umid qilishmoqda.

8. Katta ehtimol bilan «Madrid» yangi xaridlarni amalga oshirmaydi. Klub ijaradan qaytadigan futbolchilar — Hakimiy, Edegor, Regilon, Sebalyos, shuningdek, Reynyer, Kubo va Braim orqali tarkibni yoshartirmoqchi.