«Yuventus» yarim himoyachisi Adriyen Rabyo nima uchun klub ixtiyoriga yetib kelmayotgani aniq bo‘ldi. U aprel oyidan buyon Fransiyada bo‘lib turibdi.

"La Stampa" tarqatgan xabarga ko‘ra, o‘yinchi jamoaning maoshlarni qisqartirish borasidagi qaroriga norozilik bildirish maqsadida klubga qaytishni istamayapti. Ushbu g‘oya Adriyenning onasi va agenti – Veronik Rabyoga tegishli. Yarim himoyachi "keksa sinyora"ning qo‘ng‘iroqlariga javob bermadi.

Rabyoning bu qilig‘i «Yuventus» rahbariyatiga yoqmadi. Shu bois, klub uni yozgi transfer paytida sotib yuborishga tayyor.

Rabyo o‘tgan yilning yozida «Pari Sen-Jermen»dan erkin agent sifatida o‘tgan edi. Ushbu mavsumda 25 yoshli futbolchi A seriya doirasida 17ta o‘yinda maydonga tushdi.