Kecha "Oriat Dono" radiosining "Futbol plyus" dasturiga intervyu bergan O‘zbekiston professional ligasi bosh direktori vazifasini bajaruvchi Diyor Imomxo‘jayev keyingi yillarda mamlakatda futbolni rivojlantirish uchun Xorvatiya modelini tanlamoqchi ekanini ma’lum qildi.

"Men O‘zbekistonda futbolni rivojlantirishning Xorvatiya modelini taklif qilmoqchiman. Nima uchun Xorvatiya? Birinchidan, kam pul sarflash orqali terma jamoani kuchaytirish mumkin. Ikkinchidan, klublar qo‘shimcha pul topish imkoniyatiga ega bo‘lishadi.

Bu qanday amalga oshiriladi? Barcha klublari o‘z akademiyalari orqali iqtidorli futbolchilarni tarbiyalab, ularni xorij klublari transfer qila boshlashadi. Masalan, Xorvatiyaning eng kuchli futbolchilari Yevropaning top-5 chempionatlarida, o‘rtacha saviyadagi o‘yinchilari qit’aning boshqa chempionatlarida, kuchsiz futbolchilari esa Osiyo klublarida o‘ynashadi. Biz ham shunday yo‘ldan borsak, bundan faqat terma jamoamiz yutadi. Taqqoslash uchun aytishim mumkin, Rossiya o‘z futboli uchun Xorvatiyaga nisbatan 10 baravar ko‘p pul sarflaydi, ammo terma jamoa miyoqsida xorvatlar ancha kuchli hisoblanadi.

O‘zbekiston futbolga ajratilayotgan mablag‘ borasida Xitoy, Yaponiya, Janubiy Koreya, Saudiya Arabistoni, Qatar, Birlashgan Arab Amirliklari bilan teng kela olmaydi. Shunday ekan, faqatgina o‘yinchilarni kuchli klublarga transfer qilish orqali milliy jamoamizni kuchaytirishimiz mumkin.

Bu esa klublarga yaxshigina pul ishlash imkonini bersa, xorijga yo‘l olgan futbolchilarimiz o‘zlarini yuqori daromad bilan ta’minlaydilar", — degan mazmunda o‘z g‘oyalari bilan o‘rtoqlashdi Diyor Imomxo‘jayev.