Кеча "Ориат Доно" радиосининг "Футбол плюс" дастурига интервью берган Ўзбекистон профессионал лигаси бош директори вазифасини бажарувчи Диёр Имомхўжаев кейинги йилларда мамлакатда футболни ривожлантириш учун Хорватия моделини танламоқчи эканини маълум қилди.

"Мен Ўзбекистонда футболни ривожлантиришнинг Хорватия моделини таклиф қилмоқчиман. Нима учун Хорватия? Биринчидан, кам пул сарфлаш орқали терма жамоани кучайтириш мумкин. Иккинчидан, клублар қўшимча пул топиш имкониятига эга бўлишади.

Бу қандай амалга оширилади? Барча клублари ўз академиялари орқали иқтидорли футболчиларни тарбиялаб, уларни хориж клублари трансфер қила бошлашади. Масалан, Хорватиянинг энг кучли футболчилари Европанинг топ-5 чемпионатларида, ўртача савиядаги ўйинчилари қитъанинг бошқа чемпионатларида, кучсиз футболчилари эса Осиё клубларида ўйнашади. Биз ҳам шундай йўлдан борсак, бундан фақат терма жамоамиз ютади. Таққослаш учун айтишим мумкин, Россия ўз футболи учун Хорватияга нисбатан 10 баравар кўп пул сарфлайди, аммо терма жамоа миёқсида хорватлар анча кучли ҳисобланади.

Ўзбекистон футболга ажратилаётган маблағ борасида Хитой, Япония, Жанубий Корея, Саудия Арабистони, Қатар, Бирлашган Араб Амирликлари билан тенг кела олмайди. Шундай экан, фақатгина ўйинчиларни кучли клубларга трансфер қилиш орқали миллий жамоамизни кучайтиришимиз мумкин.

Бу эса клубларга яхшигина пул ишлаш имконини берса, хорижга йўл олган футболчиларимиз ўзларини юқори даромад билан таъминлайдилар", — деган мазмунда ўз ғоялари билан ўртоқлашди Диёр Имомхўжаев.