La liga va Ispaniya qirollik futbol federasiyasi (RFEF) rahbariyati uchrashuvlarni dushanba kuni ham o‘tkazish borasida kelishuvga erishishdi. Bu haqda "Cadena Cope" xabar tarqatdi.

2019/2020 yilgi mavsumning yakuniy qismi uchun taqvimni tuzishda dushanba kunidan ham foydalaniladi. Dastlab RFEF ushbu g‘oyaga qarshi edi. Ammo keyingi 5ta mavsumda dushanba kuni o‘yin o‘tkazmaslik sharti bilan La liga taklifiga rozilik bildirdi.

2019/2020 yilgi mavsum oldidan La liga va RFEF taqvim borasida ziddiyatga borishgan edi. Federasiya dushanba va juma kunlariga o‘yin qo‘ymaslikni talab qilgan bo‘lsa, Liga rahbariyati tur bahsini 4 kun davomida o‘tkazishni istagandi. Yakunda mamlakat sport arbitraj sudi qarori bilan juma kuniga ham o‘yinlarni belgilashga ruxsat berilgan edi.

Federasiya prezidenti Luis Rubialesning fikricha, dushanba kungi o‘yinlar muxlislar o‘rtasidagi u qadar ommabop bo‘lmaydi. La liga rahbariyati esa turni to‘rt kunga cho‘zish teletranslyasiya nuqtai nazaridan manfaatli deb hisoblaydi.

Avvalroq Ispaniya chempionatining qolgan qismi har kuni o‘yin o‘tkazish orqali yakunlanishi haqida xabar tarqatilgan edi. Bunda har bir klub uchrashuvlar orasida dam olish uchun kamida 72 soat dam olish uchun imkoniyatga ega bo‘ladi.