«Manchester Yunayted» klubi va Angliya terma jamoasi sobiq hujumchisi Endi Koul 2017 yilda buyrak ko‘chirib o‘tkazish operasiyasini boshdan o‘tkazgan. Hozirda u o‘zini qanday his qilayotganini aytib o‘tdi.

«Haddan tashqari uzoq kelajakka nazar tashlamayman. Hattoki, ertaga nima bo‘lishini bilmayman. Yaqinda juda qiyin kunlarimdan birini boshdan kechirdim. Yonimda qizim bor edi va u menga dalda berdi: «Dada, siz uzoq umr ko‘rasiz». Men buni unutmayman, chunki men unga: «Agar 50 yoshgacha yashasam, armonim yo‘q edi», deb aytdim.

50 yoshgacha bir yildan oshiqroq vaqt qoldi. O‘sha paytgacha yashaymanmi? Qanday qiyinchiliklarni boshdan kechirganimni inobatga olganda, bu yoshgacha yashasam o‘zimni baxtli his qilardim. Bir kun ko‘zimni ochganimda buyraklarimning ishlashdan to‘xtab qolishidan juda qo‘rqaman. Boshqa hech narsa meni qiziqtirmaydi. Eng katta qo‘rquvim shundan iborat», — dedi Koul "The Mirror"ga bergan intervyusida.

Eslatib o‘tamiz, Koul 2021 yilning 15 oktyabr kuni 50 yoshga to‘ladi. 2017 yilda u buyrak ko‘chirib o‘tkazish operasiyasini boshdan kechirgan. Jiyani Aleksandr Palmer Endiga o‘z buyragini bergan.