Coca Cola superligasining 4-tur uchrashuvi "Bunyodkor" - "Qo‘qon-1912" o‘yini bilan boshlanadi. Ushbu o‘yindan oldin qo‘qonliklarning iqtidorli futbolchilaridan biri, Qo‘qon futboli tarbiyalanuvchisi Avazxon Mamatxo‘jayev o‘z fikrlarini quyidagicha izhor qildi.

"Barchamiz superliga restartini sabrsizlik bilan kutyapmiz. "Bunyodkor" jamoasiga qarshi tayyorgarligimiz, murabbiylarimizning rejalari asosida davom etmoqda. Jamoamizda sog‘lom raqobat mavjud. Barcha futolchilar asosiy tarkibga kirish uchun astoydil ter to‘kmoqdamiz. O‘zimga keladigan bo‘lsam maydonga tushish uchun tayyorman. Jamoamizga yordam berish uchun qo‘limdan kelgancha, chin yurakdan harakat qilaman. Jamoamizda muhit juda ajoyib,  bir oila kabi ahilmiz. Mana shu birdamiligimiz tufayli "Bunyodkor" bilan uchrashuvda ijobiy natija qayd etishimizga ishonaman. Biz koronavirus pandemiyasi tufayli biroz kayfiyatlari tushgan muxlislarimizni o‘zimizning chiroyli o‘yinimiz hamda g‘alabalarimiz bilan xursand qilishni asosiy maqsad qilib qo‘yganmiz!", — dedi Mamatxo‘jayev.