"Bunyodkor" bilan bellashuvdan keyin o‘yin davomida bir necha bor "Paxtakor"ni goldan qutqargan Eldor Suyunov bahs to‘g‘risida fikrlarini bildirdi.
- Jizzaxdagi mag‘lubiyatda birinchi navbatda o‘zimiz aybdormiz va undan to‘g‘ri xulosa chiqardik. Lekin bir narsani aytib o‘tishim kerak: tez va tomoshabop futbol o‘ynash uchun tekis, yaxshi futbol maydoni bo‘lishi zarur. Jizzaxdagi maydonda esa sifatli futbol o‘ynab bo‘lmaydi, chunki maydon tekis emas va tez o‘ynashga yo‘l qo‘ymaslik uchun ataylab maydonga suv sepishmadi.
"Bunyodkor" bilan uchrashuvda barcha jamoadoshlarim maydonda o‘z ishlarini a’lo darajada bajarishdi va ajoyib g‘alabaga erishdik. Karantindan keyingi birinchi o‘yinimda maydonga tushganim bois o‘yin sur’atiga tez kirishib ketishim kerak edi. Menimcha, hammasi birinchi o‘yin uchun yaxshi kechdi.
Bellashuvdan avval barcha jamoalar singari raqibni chuqur o‘rganib chiqamiz. Jamoani qutqargan vaziyatlarga kelsak, o‘sha holatlarda omadim keldi va quruq o‘yin o‘tkazdim. Keyingi o‘yinlarda ham shu ruhda davom etishga intilamiz. Muxlislarni g‘alabalar bilan televideniye orqali bo‘lsa ham xursand qilishga urinamiz.
