AGMK bosh murabbiyi Superliganing 5-turi doirasida bo‘lib o‘tgan "Surxon"ga qarshi o‘yin (1:0) borasida o‘z fikrlari bilan o‘rtoqlashdi.

"O‘yin oson bo‘lmadi. "Surxon" malakali futbolchilarga ega yaxshi shakllangan jamoa. O‘tgan turda ular “Mash’al”ni yutolmaganlari tufayli ham bugun yanada kuchli ishtiyoq bilan o‘ynashdi. Ular bugun himoyaga e’tibor qaratgan holda, qarshi hujum taktikasiga tayanib o‘ynadi. Qolaversa, «Surxon»da qarshi hujumda yaxshi harakatlanadigan hujumchi - Kasyan bor.

Raqib asosan himoyada o‘ynagani bois  birinchi bo‘limda ularning mudofaasidan o‘tishga qiynaldik. Ikkinchi bo‘limda o‘zimizda kuch topib, shiddatkor o‘yin taklif etdik. Shuningdek, o‘yinga tezlik, dinamika qo‘shildi. Natijada vaziyatlar paydo bo‘ldi.

Vaziyatlardan samarali foydalanishda kamchiliklar bor. Chunki o‘yin ritmini his etish uchun futbolchilarga vaqt kerak. Karantin tufayli 3 oy dam olindi. Bu hazil emas. Mashg‘ulot boshqa - maydonda rasmiy o‘yin o‘tkazish boshqa. Qolaversa, ikki futbolchimizda (Shorahmedov va Zonich) jarohat borligi tufayli ular bugun o‘yinda ishtirok etishmadi. Tarkibda o‘zgarishlar bo‘ldi. Endi rotasiya qilib turamiz", — dedi Qosimov.