"Coca Cola" Superligasining 6-tur doirasida "Andijon" Jizzaxda "So‘g‘diyona" jamoasiga qarshi bahs olib bordi.

Uchrashuvga ikki jamoa ikki xil kayfiyatda tashrif buyurgandi. Chempionat restaridan keyin o‘tkazilgan ikki turda maydon egalari "Paxtakor"ni Jizzaxda, "Lokomotiv"ni esa Toshkentda yengan bo‘lsa, "Andijon" safarda "Buxoro" bilan durang o‘ynab, o‘z maydonida kutilmaganda "Metallurg" jamoasiga imkoniyatni boy berib qo‘ygandi.

Uchrashuvda Ulug‘bek Baqoyev uchta hujumchini maydonga tushirishga qaror qilgan bo‘lsa, "Andijon" jamoasi 5 ta himoyachi bilan harakat qilishni boshladi.

Birinchi bo‘limda har ikki jamoa ham gollar urish uchun imkoniyat bo‘ldi. Lekin, gohida himoyachilar va darvozabonlar aniq harakat qilishgan bo‘lsa, gohida hujumchilarga aniqlik yetishmadi. Shu tariqa birinchi bo‘limda hisob ochilmadi.

Ikkinchi bo‘limni ham jamoalar ehtiyotkorlik bilan boshladi. "So‘g‘diyona" o‘z maydonida o‘ynayotgani uchun e’tiborni hujumga qaratgan bo‘lsa, "Andijon" o‘z baxtini qarshi hujumda izlashga qaror qildi.

Uchrashuvning 63-daqiqasida Elyor Oripovning o‘ng qanotdan oshirib bergan to‘pini ikki bo‘ydor himoyachilarimiz qurshovida turgan, unchalik baland bo‘yga ega bo‘lmagan Shohruz Norxonov to‘pga boshi bilan aniq zarba berib hisobni ochdi.

Uchrashuvning asosiy vaqti yakunlanib borayotgan pallada "Andijon" jamoasi sardor Farhod Bekmuratov olisdan raqib darvozasiga zarba yo‘llab, hisobni tenglashtirdi!

Shu tariqa uchrashuvda boshqa gol kiritilmadi. Ikki turdan beri g‘alaba qozonib kelayotgan "So‘g‘diyona" omadli yurishini o‘z maydonida to‘xtatgan bo‘lsa, "Andijon" safarda bir ochkoni qo‘lga kiritdi.

Coca Cola Superliga. 6-tur
SO‘G‘DIYONA – ANDIJON 1:1
Gollar: Shohruz Norxonov 63, - 1:0 (Elyor Orifov) - Farhod Bekmuratov 90+1
"So‘g‘diyona": 27.Milan Mitrovich, 2.Sardor Qulmatov, 3.Iskandar Shoyqulov, 4.Elyor Orifov (18.SHavkat Mullajonov, 73), 7.Sanjar Rashidov (8.Jamshid Boltaboyev, 58), 10.SHohruz Norxonov (Ayubxon No‘’monov), 11.Jasur Hasanov, 12.San’at Shixov, 17.Ivan Nagayev (20.Bahodir Nasimov, 58), 80.Elivelto Ribeyro (19.Javohir Qahramonov, 58), 93.Marko Kolakovich.
"Andijon": 71.Islombek Abdullayev, 4.Farhod Mirahmatov, 7.Jamshid Hasanov, 8.Farhodbek Bekmurodov, 9.Emmanuel Arivchukvu, 14.Mishel Ibe, 17.Abdullo Olimov (33.Doniyor Abdumannonov, 74), 22.Usmonali Ismonaliyev, 23.Timur Usmonov, 77.Jahongir Abdumo‘minov (10.Artyom Litvyakov, 74), 88.Dmitro Zozulya.
Ogohlantirishlar: Timur Usmonov 11, Sardor Qulmatov 11, Iskandar Shoyqulov 24, San’at Shixov 71
Hakamlar: Jasur Muxtorov, Andrey Sapenko, Timar Gaynullin, Nayim Qosimov
Nazoratchi: Noil Lutfullin
Komissar: Sardor Qudratullayev