1-2 iyul kunlari Coca Cola Superligasida 7-tur uchrashuvlari bo‘lib o‘tadi.

Bugun «Lokomotiv» o‘z maydonida «Qizilqum»ga qarshi bahs olib boradi. Turnir jadvalida «Lokomotiv» 6ta o‘yindan so‘ng 6 ochko bilan 10-o‘rinda boryapti. Jamoa ikki bor g‘alaba qozonib, 4 marta mag‘lub bo‘lgan. To‘plar nisbati 6-10.

«Qizilqum» esa atigi 1 ochko to‘plagan holda oxirgi o‘rinni egallab turibdi. Navoiyliklar hisobida 1 durang, 5 mag‘lubiyat bo‘lib, to‘plar nisbati 3-13. «Qizilqum» bu yil Superligada hali g‘alaba qozonmagan uchta jamoadan biri bo‘lib turibdi.

Qizig‘i shundaki, har ikki jamoa o‘z ochkolarini karantingacha o‘tgan dastlabki uchta turda yiqqan. «Lokomotiv»ning ikkita g‘alabasi uyda «Andijon» va «Buxoro» bilan kechgan bahslarda qo‘lga kiritilgandi, «Qizilqum» esa safarda «Mash’al» bilan durang o‘ynagan.

Lekin karantindan so‘ng negadir ikkala jamoaning ham omadi kelmayapti. «Lokomotiv»ning ketma-ket uch mag‘lubiyati «Metallurg» (0:3), «So‘g‘diyona» (1:2), «Bunyodkor» (0:2) bilan o‘yinlarda qayd etilgan bo‘lsa, «Qizilqum» AGMK (0:1), «Qo‘qon-1912» (0:4) va «Paxtakor» (0:2) bilan kechgan o‘yinlarda imkoniyatni boy berdi.

Navbatdagi to‘qnashuv oldidan mezbon «Lokomotiv»ning imkoniyatlari yuqori baholanmoqda. Jamoa birinchidan o‘z maydonida o‘ynaydi. Ikkinchidan jamoa tarkibida mahoratli futbolchilar ko‘proq. Lekin «Qizilqum» ham yuqoriga intilish uchun astoydil kurash olib bormoqda. Bu esa uchrashuv qiziqarli kechishidan darak beradi.

P.S. «Lokomotiv» - «Qizilqum» bahsini bugun soat 19:00dan boshlab «Oilaviy» telekanalida to‘g‘ridan-to‘g‘ri tomosha qiling.