Superliganing 7-tur doirasidagi "Qo‘qon-1912" - "Mash’al" uchrashuvidan keyingi matbuot anjumanining ikkinchi qismida jamoamiz ustozi Baxtiyor Ashurmatov qatnashdi.

- Avvalambor, stadionga kela olmagan muxlislarimizni bugungi g‘alaba bilan tabriklayman. Masofdan turib bizni qo‘llab-quvatlab turgan, ayniqsa stadionga qo‘shni binolarda turgan ashaddiy ishqibozlarimizga ham o‘z minnatdorchilik bildiraman. Bugungi g‘alaba uchun barchaga tashakkur aytaman. “Mash’al” bilan o‘yin oson bo‘lmasligini bilardik. Muborakliklar har qanday holatda ham oxirigacha kurashadigan jamoa. Shuning uchun yigitlarga g‘alaba uchun alohida rahmat aytaman.

¬Eng asosiysi g‘alaba va uch ochko. Biz har bir o‘yinda ikki nafar hujumchi bilan maydonga tushyapmiz. Vaziyatga qarab, markazni kuchaytirishga harakat qilyapmiz.

Bugungi o‘yinning birinchi bo‘limidan ko‘nglim to‘lmadi. Hisobni ochgach, himoyaga yotib olganimiz menga yoqmadi. Shuning uchun shogirdlarimga oldinga borish uchun ko‘rsatmalar berib turdim.
Murod Xolmuhammedov singari standart vaziyatlar ustasining jamoamizda bo‘lishi esa bu bizning baxtimiz. Hozir dunyo futbolida urilayotgan gollarning 60-70 foizi standartlardan urilmoqda. Albatta jamoamizda standartlarni a’lo darajada amalga oshira oladigan futbolchilarimizning borligi bizni xursand qiladi.

“Mash’al” safida nomdor futbolchilar bo‘lmasa-da, oxirigacha kurashishdi. Ular gol o‘tkazib yuborganlaridan keyin bizni himoyalanishga majbur qilishdi.

Raqib jamoaga qarab, tarkib tanlaymiz. Kim kuchli bo‘lsa o‘sha futbolchi maydonga tushadi. Jamoamizda sog‘lom raqobat mavjud. Zahiradan maydonga tushayotgan futbolchilarimiz ham o‘yinlarimizni kuchaytirishmoqda. Bizda teng kuchli ikkita tarkib bor. G‘alabalarimizda esa barcha futbolchilarimzning hissalari bor.