Coca Cola Superliga 7-turidan o‘rin olgan “Navbahor” – “So‘g‘diyona” (2:0) uchrashuvidan keyingi matbuot anjumanining birinchi qismida jizzaxliklar bosh murabbiyi Ulug‘bek Baqoyev ishtirok etib, o‘yin haqida o‘z fikrlarini bildirdi.

- O‘yin borasida to‘xtaladigan bo‘lsam, uchrashuv ikki seriyadan iborat bo‘ldi, deyish mumkin. Birinchi bo‘limda o‘z imkoniyatlarimizdan foydalana olmadik, ikkinchi bo‘limda esa raqib o‘z xatolarimizdan foydalangan holda, g‘alaba qozondi. Nimayam derdim, futbolda xatolar ham bo‘lib turadi. Bugungi yutuq bilan “Navbahor”ni tabriklayman va jamoaga keyingi bahslarda ham omad yor bo‘lishini tilayman.

Menimcha, jamoamiz futbolchilarning saviyasi, mahorati yoki omadsizlik tufayli mag‘lubiyatga uchramadi. Shunchaki, mezbonlar yuzaga kelgan imkoniyatlardan samarali tarzda foydalana olishdi, shogirdlarim esa buni amalga oshira olishmadi.

Futbol xatolardan iborat o‘yin. Kim xatolarga yo‘l qo‘ysa, yutqazadi, kim gol ursa, g‘alaba qozonadi.  

Yigitlarga e’tirozim yo‘q, ular harakat qilishdi, shunchaki gol urisholmadi. Bu futbol. Futbolda esa doimo g‘alaba qozona olmaysan.

Albatta, natijadan qoniqmadim, jamoamiz maydonga g‘alaba ishtiyoqida tushgandi.  Yigitlarning o‘yinlaridan qoniqish hosil qildim, lekin natijadan emas.

“So‘g‘diyona” Namanganda hech qachon yuta olmaganligini to‘g‘risi, bilmagandim.      

Shaxsiy fikrimcha, “Navbahor” joriy mavsumda medallar uchun kurash olib boradi. O‘zbekiston kubogida esa finalgacha bora oladi.

Jamoa safida yaxshi futbolchilar jamlangan va Namanganda buyuk murabbiy faoliyat yuritmoqda.

“Navbahor” PFK matbuot xizmati.