"Qo‘qon-1912" - "Nasaf" uchrashuvidan  keyingi matbuot anjumanining ikkinchi qismida "Qo‘qon-1912" jamoasi  bosh murabbiyi Baxtiyor Ashurmatov ishtirok etdi.

"Bugun judayam qiyin, murakkab, his-hayajonlarga boy o‘yin bo‘ldi. Ro‘ziqul aka Berdiyev judayam tezkor jamoa tuzgan. Biz "Nasaf"ni o‘rganib, ularning qarshi hujumlarda tezkorligini hisobga olib, bir nafar hujumchi bilan o‘yinni boshlagan edik. O‘ylaymanki, bu qarorimiz qaysidir jihatdan o‘zini oqladi. Futbolchilarimga bugungi o‘yin uchun rahmat aytaman, ular ikki marta hisobda ortda qolishlariga qaramay hisobni tenglashtirishga erishishdi. Afsuski, o‘yin so‘nggida ikkita juda qulay imkoniyatdan foydalana olmadik. O‘sha vaziyatlarda yosh hujumchimiz vaziyatlarni golga aylantira olmadi. Biz o‘yin so‘nggida g‘alabani ilib ketishimiz ham mumkin edi.

Durang manimcha adolatli bo‘ldi. Bugun taktik jihatdan juda kuchli o‘yin bo‘ldi. Uchrashuv golli vaziyatlarga ham boy bo‘lgani uchun teleekran  qarshisida o‘tirgan muxlislarimizga yoqdi deb o‘ylayman.

Bamba o‘tgan o‘yinlarda zaxiradan tushib o‘yinimizni kuchaytirayotgan edi. Shuning uchun uni boshlang‘ich tarkibga kiritgan edim. Yakuba bugun o‘z darajasidagi o‘yinni ko‘rsata olmadi. O‘yinda dastlabki golni mehmonlar kiritgani uchun rejalarimizga o‘zgartirishlar kiritdik.

Bizda ikki nafar teng kuchli darvozabonlar bor. Ularni sport formalarini birdek ushlab turish uchun ham har ikkalariga imkoniyat taqdim qilyapmiz.

Yosovich mashg‘ulotlarda jarohat olgani uchun Oybek Rustamovni markaziy himoyada o‘ynatdik. Oybek himoyada ham yaxshi o‘ynay oladi. Bizda himoyachilarimiz yetarli bu borada muammolarimiz yo‘q. O‘tkazgan gollarimiz esa "Nasaf" futbolchilarining tezkorligi sababli bo‘ldi deb o‘ylayman.

Keyingi turda o‘z maydonimizda "Paxtakor"ni qabul qilamiz. Bu o‘yin yanayam qiziqarli bo‘ladi deb o‘ylayman.  Biz bu uchrashuvga yaxshi tayyorgarlik ko‘rib muxlislarimizni xursand qilishga harakat qilamiz. Superligada hamma jamoalar bilan o‘ynasa bo‘ladi", — dedi Baxtiyor Ashurmatov.