Chempionshipning 45-turida "Vest Bromvich" "Haddersfild"ga (1:2) mag‘lubiyatga uchragach, Angliya Premyer-ligasiga yo‘llanma olgan dastlabki klub nomi ma’lum bo‘ldi.
Turnir yakuniga bir tur qolganida Slaven Bilich boshqaruvidagi "Vest Bromvich" 82 ochko bilan 2-o‘rindan joy olgan. Marselo Byelsa boshqaruvidagi peshqadam "Lids" esa 44 o‘yinda 87 ochko to‘plagan. Chempionshipdagi dastlabki ikki o‘rin sohibi Angliya Premyer-ligasiga to‘g‘ridan-to‘g‘ri yo‘llanma olishini inobatga olsak, "Lids" amalda APL yo‘llanmasini rasmiylashtirgan sanaladi.
Eslatib o‘tamiz, "Lids" so‘nggi bor 2003/04 yilgi mavsumda Angliya Premyer-ligasida ishtirok etib, yakunda quyi divizionga tushib ketgan edi.