Чемпионшипнинг 45-турида "Вест Бромвич" "Ҳаддерсфилд"га (1:2) мағлубиятга учрагач, Англия Премьер-лигасига йўлланма олган дастлабки клуб номи маълум бўлди.
Турнир якунига бир тур қолганида Славен Билич бошқарувидаги "Вест Бромвич" 82 очко билан 2-ўриндан жой олган. Марсело Бьелса бошқарувидаги пешқадам "Лидс" эса 44 ўйинда 87 очко тўплаган. Чемпионшипдаги дастлабки икки ўрин соҳиби Англия Премьер-лигасига тўғридан-тўғри йўлланма олишини инобатга олсак, "Лидс" амалда АПЛ йўлланмасини расмийлаштирган саналади.
Эслатиб ўтамиз, "Лидс" сўнгги бор 2003/04 йилги мавсумда Англия Премьер-лигасида иштирок этиб, якунда қуйи дивизионга тушиб кетган эди.