«Yuventus» klubi navbatdagi chempionlikka yaqin turibdi. Maurisio Sarri jamoasi bugun bo‘lib o‘tadigan "Udineze"ga qarshi uchrashuvda g‘alaba qozonsa, muddatidan oldin Skudettoni qo‘lga kiritadi.

Turinliklar ayni paytda 80 ochko to‘plagan holda ikkinchi o‘rindagi «Atalanta»dan 6 ochko oldinda borishmoqda. Bergamoliklar hisobida 3ta o‘yin qolgan bo‘lsa, "Yuve" yana 4ta uchrashuv o‘tkazishi kerak.

Shu bilan birgalikda, «Yuventus» o‘zaro o‘yinlarga ko‘ra «Atalanta»dan ustunlikka ega: birinchi davrada "keksa sinyora" g‘alaba qozongan bo‘lsa (3:1), ikkinchi davradagi bahsda durang qayd etilgan edi (2:2).

Shu tariqa, «Yuve» payshanba kuni «Udineze»ni safarda mag‘lub etsa, 2-o‘rindagi klub bilan farqni 9taga yetkazadi va ketma-ket to‘qqizinchi marotaba A seriya chempioniga aylanadi.

Eslatib o‘tamiz, «Udineze» - «Yuventus» bahsi 23 iyul kuni Toshkent vaqti bilan 22:30da boshlanadi.