«PSJ» hujumchisi Kilian Mbappe «Sent-Etyen»ga qarshi bo‘lib o‘tgan Fransiya kubogi finalida jarohat oldi. Bahsning 27-daqiqasida Loik Perren fransiyalik futbolchining oyog‘iga keskin tashlandi.

Hakam Amori Deleryu himoyachiga dastlab sariq kartochka ko‘rsatgan edi. VAR bilan maslahatlashgach, u o‘z qarorini "qizil"ga almashtirdi.

Mbappe uchrashuvni davom ettira olmadi, uning o‘rniga Pablo Sarabiya tushirildi.

Kilian taqdirlash marosimiga qo‘ltiqtayoqlar yordamida chiqib keldi va u yerda Fransiya prezidenti Emmanuel Makron bilan suhbatlashdi.

– Ahvoling qalay? – deya so‘radi prezident.
– Ozgina og‘riq bor.

– Nima deb o‘ylaysan, oyog‘ing sinmaganmi?
– Menimcha, yo‘q.

– Shifoxonaga yotasanmi?
– Ha, taqdirlash marosimidan keyin, – dedi Mbappe.

Mbappe bugun chuqurlashtirilgan tibbiy ko‘rikdan o‘tganidan keyin uning jarohati qay darajada ekani ma’lum bo‘ladi. "PSJ" 31 iyul kuni Fransiya liga kubogi finali doirasida «Lion» bilan to‘qnash keladi. Shuningdek, parijliklar 12 avgust kuni "Atalanta"ga qarshi Yevropa chempionlar ligasi chorak final bosqichi doirasida maydonga chiqishadi.