Angliyaning “Manchester Yunayted” jamoasi bosh murabbiyi One Gunnar Sulsher Yevropa Ligasi yarim final o‘yini oldidan o‘z fikr va mulohazalari bilan o‘rtoqlashib o‘tdi. Ispaniyaning “Sevilya” jamoasiga qarshi uchrashuvda “qizil iblislar” ustozi shogirdlari ikki hissa kuch bilan harakat qilishiga ishonchi komil ekanligini yashirib o‘tirmadi.

“Biz bu mavsumda ikkita yarim finalda to‘p tepdik, va omadsizlikka uchradik. O‘ylashimcha, yarim finallar borasida yetarlicha natija qayd etdik. Endi, bor e’tiborimizni sovrinlarga qaratishimiz kerak. Yarim finalga chiqish ajoyib natija, ammo “Manchester Yunayted” uchun yetarli emas.

Jamoa endi to‘liq shakillandi va g‘alabalarga juda o‘ch. Eng muhimi esa, ikkita yarim finaldagi alamli mag‘lubiyatlar bizni “Sevilya”ga qarshi o‘yin oldidan ruhlantirishi kerak. Shu sababli, musobaqadagi boshqa jamoalardan ham ko‘ra ko‘proq biz chempion bo‘lishni istashimiz darkor. Ikkita kubok bahsini kuchli to‘rtlikda yakunlaganimiz yetarli. Endi oldinga qadam tashlashimiz kerak.

Futbol juda qiziq sport turi. Agar, mag‘lubiyatga uchrasang, juda alamli hisni tuyushga majbur bo‘lasan. Buni yengib o‘tgach, ushbu hisni yurakdan tuymaslik uchun keyingi o‘yinlarda ko‘proq harakat qilish lozimligini anglab yetasan. Umid qilaman-ki, shogirdlarim mavsum so‘nggiga qadar boshqa bu hisni tuyushlariga xojat qolmaydi. Shu sababli, “Sevilya”ga qarshi o‘yinda siz g‘alabaga chanqoq, hujumkor “Manchester Yunayted”ni maydonda ko‘rasiz!”