Pandemiya sabab yuzaga kelgan tanaffusdan so‘ng, bugun Coca Cola Superligasi bahslari qayta davom ettiriladi.
Aytish lozimki, ushbu o‘yinlarning qayta davom ettirilishi birinchi navbatda futbolchilar va murabbiylar salomatligi uchun qayg‘urgan, pandemiya davrida barcha qatori futbol klublari, futbolchilar, murabbiylar va barcha personal bilan ishlagan shifokorlarning mehnatlari bilan amalga oshirildi.
Ma’lumki, bungacha O‘zPFL futbol klublari, futbolchi va murabbiylarni virusdan himoyalash, virusga chalingan futbolchi va murabbiylarni izolyasiyaga olib, ularni davolash uchun barcha zarur choralarni amalga oshirib keldi. Muntazam ravishda futbolchilarni koronavirus uchun testdan o‘tkazish, test natijalariga ko‘ra ularni davolash, jismoniy holatni yaxshilash va ularni nazorat qilish uchun jalb etilgan shifokorlarning mehnati beqiyosdir.
Aynan shu bois, O‘zPFL qiyin davrda faoliyat olib borayotgan shifokorlarni qo‘llab-quvvatlash aksiyasida ishtirok etadi. Bugun “Paxtakor” stadionida 9-turning qoldirilgan uchrashuvi – “Buxoro” hamda “Bunyodkor” klublari o‘rtasidagi uchrashuvni aynan pandemiya davrida faoliyat olib borgan va katta mehnat qilgan shifokorlardan biri ramziy ochib beradi. Futbolchilar esa, ularga minnatdorchilik ramzi tushirilgan liboslar bilan harakat qilishadi.
