Пандемия сабаб юзага келган танаффусдан сўнг, бугун Coca Cola Суперлигаси баҳслари қайта давом эттирилади.

Айтиш лозимки, ушбу ўйинларнинг қайта давом эттирилиши биринчи навбатда футболчилар ва мураббийлар саломатлиги учун қайғурган, пандемия даврида барча қатори футбол клублари, футболчилар, мураббийлар ва барча персонал билан ишлаган шифокорларнинг меҳнатлари билан амалга оширилди.

Маълумки, бунгача ЎзПФЛ футбол клублари, футболчи ва мураббийларни вирусдан ҳимоялаш, вирусга чалинган футболчи ва мураббийларни изоляцияга олиб, уларни даволаш учун барча зарур чораларни амалга ошириб келди. Мунтазам равишда футболчиларни коронавирус учун тестдан ўтказиш, тест натижаларига кўра уларни даволаш, жисмоний ҳолатни яхшилаш ва уларни назорат қилиш учун жалб этилган шифокорларнинг меҳнати беқиёсдир.

Айнан шу боис, ЎзПФЛ қийин даврда фаолият олиб бораётган шифокорларни қўллаб-қувватлаш акциясида иштирок этади. Бугун “Пахтакор” стадионида 9-турнинг қолдирилган учрашуви – “Бухоро” ҳамда “Бунёдкор” клублари ўртасидаги учрашувни айнан пандемия даврида фаолият олиб борган ва катта меҳнат қилган шифокорлардан бири рамзий очиб беради. Футболчилар эса, уларга миннатдорчилик рамзи туширилган либослар билан ҳаракат қилишади.