"PSJ" - "Bavariya". Chempionlar ligasi darajasiga mos final. Ikkisi ham turnirga o‘z yurti chempioni sifatida chiqqan va bu mavsum ham chempion bo‘ldi. Plyus, taxmin qilish murakkab bo‘lgan final.

Ha, "Bavariya" qo‘rqinchliroq ko‘rinadi. Biroq Mbappe, Neymar, Di Mariyalar haddan tashqari xavfli va sxemalarni buzib tashlay oladigan texnikaga ega. Muhim tomoni, ular avvalgidek alohida dunyo bo‘lib emas, o‘zaro kombinasion futbol o‘ynashga o‘rganishdi. Shuning evaziga "PSJ" nihoyat birinchi bor finalga chiqdi. Fransuzlarda asosiy kuch konsentrasiyasi oldingi chiziqda. Keyin sovuqqon “buzg‘unchilardan” iborat markaz. O‘rtacha saviyali himoya. Yaxshi darvozabon. Ya’ni hammasi alohida, guruchi, sabzisi, go‘shti. "Bavariya"da esa aralash, ya’ni pozisiya hamda chiziqlar o‘rtasida mukammal balans. Bir tekis.

"PSJ" - "Bavariya". Qat’iy va o‘ta aniq hisob-kitobga qarshi improvizasiya va noodatiy yondoshuv. Bunday ko‘rinishdagi qiziqarli finalni intizorlik bilan kutyapman, natijasiga esa befarqman. Finaldan zavq olishning eng zo‘r yo‘li shu.

Davron Fayziyev.