"ПСЖ" - "Бавария". Чемпионлар лигаси даражасига мос финал. Иккиси ҳам турнирга ўз юрти чемпиони сифатида чиққан ва бу мавсум ҳам чемпион бўлди. Плюс, тахмин қилиш мураккаб бўлган финал.

Ҳа, "Бавария" қўрқинчлироқ кўринади. Бироқ Мбаппе, Неймар, Ди Мариялар ҳаддан ташқари хавфли ва схемаларни бузиб ташлай оладиган техникага эга. Муҳим томони, улар аввалгидек алоҳида дунё бўлиб эмас, ўзаро комбинацион футбол ўйнашга ўрганишди. Шунинг эвазига "ПСЖ" ниҳоят биринчи бор финалга чиқди. Французларда асосий куч концентрацияси олдинги чизиқда. Кейин совуққон “бузғунчилардан” иборат марказ. Ўртача савияли ҳимоя. Яхши дарвозабон. Яъни ҳаммаси алоҳида, гуручи, сабзиси, гўшти. "Бавария"да эса аралаш, яъни позиция ҳамда чизиқлар ўртасида мукаммал баланс. Бир текис.

"ПСЖ" - "Бавария". Қатъий ва ўта аниқ ҳисоб-китобга қарши импровизация ва ноодатий ёндошув. Бундай кўринишдаги қизиқарли финални интизорлик билан кутяпман, натижасига эса бефарқман. Финалдан завқ олишнинг энг зўр йўли шу.

Даврон Файзиев.