«Ufa» direktorlar kengashi raisi Rostislav Murzagulov Rossiya chempionatining 4-turi doirasida bo‘lib o‘tgan «Rostov»ga qarshi uchrashuvdagi hakamlikdan mutlaqo qoniqish hosil qilmaganini ta’kidladi. Hakam Mixail Vilkov bahsning 39-daqiqasida mezbonlar futbolchisi Vyacheslav Krotovni maydondan chetlatgan bo‘lsa, rostovliklar o‘yin so‘ngida g‘alaba to‘pini kiritishdi.

«Men jurnalistlar ommasiga murojaat qilib, bizni qo‘llab-quvvatlashlarini so‘rayman. Biz bundan keyin mana shunday o‘yinlar o‘tkazadigan bo‘lsak, bundan butun Rossiya yutqazadi. Bu ahvolda biz yosh futbolchilarni yo‘qotamiz. Ular bugun maydonda nimalar sodir bo‘lganini ko‘rishdi va bunday holatda futbol bilan shug‘ullanishni istashmaydi. Bugun biz o‘n kishi bo‘lib 11 futbolchiga qarshi emas, 15 raqibga qarshi o‘ynadik.

Vilkovning bugungi ishi — juda rasvo. Bu «Spartak» — «Sochi» uchrashuvida ishlagan Kazarsevdan ikki baravar yomon. Bugun butun jamoa yig‘ilamiz va yana bitta shunday holat ro‘y beradigan bo‘lsa, chempionatdan chiqib ketish imkoniyatini muhokama qilamiz», — dedi Murzagulov.