Superliganing 13-turi doirasida bo‘lib o‘tgan "Buxoro" - AGMK uchrashuvidan keyin buxoroliklar bosh murabbiyi Jamshid Saidov o‘yin haqida o‘z fikrini bildirib o‘tdi.

"Birinchi navbatda futbolchilarimizga katta rahmat deyman, borlarini berib o‘ynaganlari, xarakter ko‘rsatishganlari uchun. Afsuski g‘alaba qozona olmadik, oxirgi daqiqalarda to‘p o‘tkazib yubordik. Futbolchilar oldilariga qo‘yilgan vazifalarni a’lo darajada bajarishdi.

Biz himoyadan o‘yinni olib borib, qarshi hujumlar orqali harakat qildik.

Bizda moliyaviy muammolar bor, PFLdan qarzimiz mavjud. Faqatgina ikki o‘yinchini tarkibimizga qo‘sha oldik. Umid qilamanki bizga yana transfer qilishga imkon berishadi. Buxorodagi stadion bu yil tayyor bo‘lmasa kerak, shu sababli «Paxtakor» bilan o‘yinni toshkentda o‘tkazamiz, bizga farqi yo‘q qayerda to‘p surishimizni, shundog‘am barcha o‘yinlarimizni neytral maydonda o‘tkazyapmiz, hozirgacha Muborakdagi stadionda uy uchrashuvlarimizni o‘tkazayatgan edik.

Himoyada hech qanaqa sarosimalik ro‘y bergani yo‘q. O‘yinga 4 daqiqa qo‘shilgan edi, lekin negadir o‘yin cho‘zilib ketdi. Men hozir bilmayman, penalti bor yoki yo‘qligini. Hakamlar qo‘mitasi o‘yinni ko‘rib o‘z baholarini berishadi degan umiddaman", — dedi Jamshid Saidov.