Stadion.uz ayni damda erkin agent maqomidagi taniqli futbolchilar bilan tanishtirib o‘tadi.
Aleshandro Pato
So‘nggi klubi “San Paulu” jamoasi bo‘lgan hujumchi ayni damda o‘zi uchun yangi jamoa izlash bilan band. Xitoy birinchiligida faoliyatini qayta ishga tushirishga urinib ko‘rgan Pato endigina 30 yoshga chiqdi. To‘g‘ri, qahramonimiz “Milan” safida ko‘rsatgan o‘yinlarini boshqa namoyish eta olmayapti, biroq uning nimalarga qodir ekanligini barcha biladi. Balki shu sababli, transfermarket portali hujumchini 5 million yevroga baholayotgandir.
Neven Subotich
Yurgen Klopp davrida Subotich Hummels bilan shu qadar ajoyib tandem hosil etdiki, hatto uni Serxio Ramos bilan solishtirishni boshlab yuborishgan edi. Afsuski, Dortmund klubidan ketish, Subotichga biroz qimmatga tushdi. Avvvaliga “Sent-Etyen” sharafini munosib himoya qilgan futbolchi ortda qolgan mavsumni “Berlin Union” klubida o‘tkazdi. Afsuski, serb kutilgan darajani namoyish etmadi. Berlinliklar esa, ajoyib o‘tmish uchungina u bilan shartnomani uzaytirishni istamadi. Oqibatda, transfer narxi 2 million yevrolik futbolchi erkin agentga aylandi.
Klaudio Bravo
Mavsum so‘nggida “Manchester Siti” bilan o‘rtadagi shartnomasi yakunlangan darvozabon ham ayni damda ko‘plab grandlar e’tiborida turibdi.
Afsuski, chililik kipper anchadan beri terma jamoadan chaqiruv olmayapti. Vaholanki, Pep Gvardiola uni “Liverpul”ga qarshi o‘yinda maydonga tushirishdan sira cho‘chimagan edi. To‘g‘ri, Bravo 37 yoshda, biroq zamonaviy futbolda bu yosh darvzabonlar uchun qo‘rqinchli emas. Uni qo‘lga kiritgan klub sira afsus chekmasligi aniq. Sababi, tajribali darvozabon istalgan vaqtda qo‘l kelishi va yoshlarga ajoyib namuna bo‘lishi turgan gap.
Gael Klishi
“Arsenal” va “Manchester Siti” klublarining sobiq qanot himoyachisi 35 yoshni “urib qo‘ydi”, ammo to‘xtash haqida bosh qotirmayapti. O‘zining so‘nggi klubi – “Istanbul” safida Robinyo bilan birgalikda Turkiya chempionligini qo‘lga kiritgan fulbek arab klublari bilan muzokaralar olib bormoqda. Turkiya chempionatida chinakam porlagan futbolchi hali-hamon jamoasi uchun naf keltirishga qodir.
Branislav Ivanovich
“Chelsi” klubining sobiq sardori “Zenit”ga Yevropa Chempionlar Ligasida guruhdan chiqishda yordam bermadi, biroq RPL darajasini birmuncha ko‘tarishga muvaffaq bo‘ldi. So‘nggi ma’lumotlarga qaraganda, “Everton” serb bilan muzokaralar olib bormoqda. Hozircha, uning qaysi klub safiga o‘tishi noma’lum. Ayni damda, himoyachining transfer qiymati 1 million yevroga teng.
Xatem Ben Arfa
Chaqqon fransuz hali-hamon maydonda shou namoyish etishga qodir. 33 yosh bo‘lishiga qaramay, Ben Arfaning dribbling va texnikasi kuchli beshlik klublarini o‘ziga rom etishi mumkin. O‘zining so‘nggi klubi “Valyadolid”da unga biroz omad kelmadi. Korona-tanaffus sababli qahramonimiz sport formasini yo‘qotib qo‘ydi. Uning agenti mijozi tez orada yana “Liga 1”da ko‘rinish berishi haqida ma’lumot tarqatmoqda.
