«Chelsi» bu mavsum ko‘p va zo‘r transferlar qildi. Ham son, ham sifat nuqtai nazardan. Lekin, agar Ngolo Kante klubni tark etganda, bu fikr shaxsan menda yo‘qqa chiqardi. Kante darajasidagi o‘yinchini ushlab qolish «Chelsi»ning asosiy prioritet masalasi bo‘lishi kerak.

Ko‘pchilik uni «Inter»ga o‘tishi deyarli aniq demoqda. Albatta, agar «Inter» bu ishni oxiriga yetkaza olsa tan beraman, qoyil qolaman, italiyaliklarning biznes yuritishiga bravo deyman. Biroq fikrimcha bu qiyin masala. Haddan tashqari mana shu kamtargina kichkintoyning londonliklar safida o‘rni va mavqei katta.

Kante hecham Lempardga yangi «Chelsi» qurishga to‘siq emas, quloq soladi, bo‘ysunadi. Murabbiy aytganini bajaruvchan, raqibning sallasi kerak desa, kallasiga shikast yetkazmay, sallani uzib olib keladi. Jangchi, sodiq askar, murabbiy orzusi.

Demak, mening taxminimcha Ngolo Kante «Chelsi»da qoladi.

Davron Fayziyev.