Superliganing 14-turidan o‘rin olgan “Navbahor” – “Paxtakor” (1:1) uchrashuvidan keyingi matbuot anjumanining birinchi qismida “Paxtakor” bosh murabbiyi Shota Arveladze ishtirok etib, o‘z fikrlarini bildirdi.
Dastlab o‘yin borasida u quyidagi fikrlarni bildirdi.
- O‘yinning boshida uch-to‘rtta vaziyatdan foydalana olmadik. Futbolda sen urmasang, senga urishadi, degan naql bor. Raqib bitta aniq zarba yo‘lladi va u gol bilan yakunlandi. Natijada durang. Aslida, o‘zimiz ham yaxshi o‘ynolmadik, o‘yinimiz sekin chiqdi. Negaligini bilmayman. Afsuski, bir-ikki holatda tezkor hujumga o‘tganda, vaziyat yaratdik. Qolgan holatlarda tezlik yetishmadi. Bugun ikki ochko yo‘qotdik.
- Stadionlarga muxlislarni kiritish vaqti kelmadimi?
- Koronavirus pandemiyasi davrida salomatlik birinchi o‘rinda bo‘lishi kerak. Ayrim mamlakatlarda, xususan, Rossiyada ham ma’lum foizda muxlislar kirishiga ruxsat berildi. Balki, shu uslubda tomoshabinlar tashrifiga izn berish ham mumkindir. Bunga murabbiy sifatida shunday javob bera olaman, xolos.
- “Paxtakor”ni oldinda Osiyo Chempionlar Ligasidagi ishtirok kutmoqda. Shu haqda gapirsangiz...
- OCHLdagi taqvimimizni yengil deb bo‘lmaydi, ko‘plab futbolchilarimiz davolanishdi. Deyarli hamma kasallandi, murakkab davrni boshdan o‘tkazdik. Mavjud holat ham jismoniy, ham ruhiy tomondan ta’sir o‘tkazadi. Qatardagi turnirga guruhda 6 ochko to‘plagan holda yetib boramiz. Qaysidir jihatdan bu ustunlik, bir tomondan futbolchilarning xotirjamlikka berilishlariga olib kelishi mumkin. Bularning barini inobatga olgan holda aytishim mumkinki, Chempionlar Ligasida, birinchi navbatda, guruhdan chiqishga intilamiz. Keyin nima bo‘lishini esa vaqt ko‘rsatadi.
“Navbahor” PFK matbuot xizmati.
