O‘zbekiston - Tojikiston terma jamoalari ishtirokidagi o‘rtoqlik uchrashuvidan keyin mehmon terma jamoa bosh murabbiyi Usmon Toshev matbuot anjumanida qatnashdi.

- Avvalo, bizni juda yaxshi, mehmondo‘stlik bilan kutib olganingiz uchun rahmat. Yaxshi o‘yin bo‘ldi. Ushbu o‘yinning tashkiliy ishlari oson bo‘lmadi. Barchaga rahmat. Bu o‘yin bizga kerak edi. O‘yin davomida ko‘rdim, 6-7 oy davomida yig‘ilmagan futbolchilarning harakatlari yomon emas. O‘yin tempini ko‘tarish biz uchun qiyin bo‘ldi. Yigitlarning bir-biri bilan til topishish yomon emas, bundan ko‘nglim to‘ldi deya olaman.

- O‘rtada katta uzilish bo‘ldi, shu sababli o‘rtoqlik uchrashuvlari orqali futbolchilarning jismoniy holatini yaxshi saviyada ushlab qolishga harakat qilamiz. Futbolchining jismoniy holati past bo‘lsa ham ko‘p narsaga erisha olmaydi. Oktyabr, noyabr oylarida ham o‘rtoqlik uchrashuvlari tashkil qilishga harakat qilamiz.

- O‘zbekistonda futbolchilar ko‘p. Termaga nomzodlar doimo ko‘pchilikni tashkil qilgan. Bizda esa kuchli futbolchilar ko‘p emas. Ikkita futbolchimiz kela olmadi. Futbolchilarda hayajon bor edi. Asosiy tayyorgarlik baribir chempionatda bo‘ladi.

- Keyingi bosqichga ikkinchi o‘rin bilan chiqish muammo emas. Navbatdagi guruhdan chiqishda qiynalamiz. Myanma bilan o‘yinda mag‘lub bo‘ldik. Bu bizga qimmatga tushmasa bo‘lgani. Qolgan ishlar yomon emas.