"Sherlar" Superliga 16-tur bahsida 8 sentyabr kuni Bekobodda "Metallurg" mehmoni bo‘lishadi.

Jamoalar safida diskvalifikasiya tufayli o‘yinni o‘tkazib yuborishga majbur bo‘ladigan futbolchilar yo‘q.

Chempionatlar tarixida "Paxtakor" ushbu raqib bilan 47 bor to‘qnash kelgan. 39 bellashuvda zafar quchgan "Paxtakor" 4tadan bahsda durang o‘ynagan va imkoniyatni boy bergan. Bekobodliklar darvozasiga jami 125 to‘p kiritilib, 36 gol o‘tkazib yuborilgan. G‘alabalarning 13tasi yirik natijalar bilan qo‘lga kiritilgan. Bekobodda o‘tgan uchrashuvlarning 17tasida "Sherlar" g‘alaba qozongan, ikki bellashuv durang bilan tugagan bo‘lsa, 4ta to‘qnashuvda "Metallurg" ustun kelgan. Mehmondagi o‘yinlarda 50 gol urilib, 19 to‘p o‘tkazib yuborilgan. Safardagi oxirgi 4ta o‘yinda jamoamiz zafar quchgan.

O‘zaro o‘yinlarda Igor Sergeev 9 gol muallifi bo‘lgan. Anvar Soliyev hisobida 8, Server Jeparovda 6, Igor Shkvirin, Aleksandr Geynrix va Bahodir Pardayevda 5, Azamat Abduraimov, Leonid Koshelev va Ismael Gonsalvesh hisobida 4tadan to‘p mavjud. "Metallurg"dan Dilmurod Karimov 6 golni o‘z hisobiga yozib qo‘ygan. Ruslan Vagapov va Zohid Abdullayev esa 3tadan to‘p kiritgan.

"Metallurg" va "Paxtakor" jamoalari o‘rtasidagi o‘yin 8 sentyabr, seshanba kuni soat 19:00da Bekoboddagi "Metallurg" stadionida boshlanadi.