"Shabab Al Ahli" bilan uchrashuvdan avval matbuot anjumanida "Paxtakor" bosh murabbiyi Shota Arveladze ishtirok etdi.

- O‘ylashimcha, dastlabki ikki o‘yin ham hal qiluvchi maqomida edi. Agar ochkolarga qarasak, bunday bahslar oldinda bizni kutib turibdi. Ushbu raqib bilan uzoq vaqt oldin, fevralda to‘qnash kelgandik. O‘shanda kuchli yomg‘ir yog‘gandi, maydonda suv bor edi. Shunga qaramay, juda yaxshi o‘yinga guvoh bo‘lgandik. Shundan beri "Shabab Al Ahli"da katta o‘zgarishlar ro‘y berdi. Bosh murabbiy almashdi, bir necha yangi o‘yinchilar bor. Bu endi yangi to‘qnashuv. Barchasiga boqsak, bizni juda qiziqarli, muhim o‘yin kutmoqda. Biz kelajakka umid bilan boqamiz.

Raqib safida o‘zgarishlar borligini ta’kidlab o‘tdim. Karlos Eduardo juda yaxshi saviyadagi futbolchi. U chap qanotda va hujum ortida yaxshi o‘ynay oladi. Oxirgi bahsda aynan uning to‘p uzatishidan keyin gol urildi. Har bir jamoa jismonan, taktik va individual ijrochilar tarafdan eng yaxshi oraliqni topa olsa, shunda eng kuchli klublar qatoriga kira oladi. Bunga erisha olgan esa eng yaxshi murabbiyga aylanadi. Biz ertaga o‘zimizni ko‘rsatishga urinamiz. Oson bo‘lmagan taqvim paytida futbolchilarni jismonan tetik saqlash juda muhim. Futbolda har bir o‘yin yangi to‘qnashuv, yangi adrenalin, yangi kundir.