Butun dunyoda karantin talablari yumshatilgach sekin-asta yirik sport musobaqalari ham o‘tkazila boshlandi. Jumladan, kelasi hafta Parij shahrida “Roland Garros” nomini olgan Fransiya ochiq chempionati start oladi. Ko‘plab sport muxlislari, ayniqsa, tennis ishqibozlari qachon Denis Istomin kortda ko‘rinish beradi, deb qiziqishayotgani tabiiy. Bu borada muxlislarga yangilik sifatida shuni aytishimiz mumkinki, yurtimizning birinchi raqamli raketkasi “Roland Garros” turnirida ishtirok etadi. Quyida Istominning O‘zbekiston tennis federasiyasi matbuot xizmatiga bergan intervyusini havola qilamiz:

“Ha, haqiqatan ham, uzoq vaqtdan beri birinchi marta musobaqada ishtirok etaman va bu birdan “Roland Garros” bo‘ladi. Kecha men Parijga yetib keldim va koronavirusga ko‘plab tahlillar topshirishga to‘g‘ri keldi. Dastlab, ketishimdan oldin Toshkentda test topshirdim. Bundan tashqari, kelganimdan so‘ng, yana test bo‘ldi. Keyin natijalarni kutish uchun meni 24 soat davomida mehmonxonada ushlab turishdi.

Test tahlili «manfiy» chiqqanidan keyingina “Filipp Shatriye” tennis kortiga borib, mashg‘ulotlarni boshladim. Endi akkreditasiyadan o‘tishim va boshqa tayyorgarlik ishlarini bajarishim mumkin. Sinovning «ijobiy» javobini olganlarni esa 7 kundan 14 kungacha karantinga olishadi. Ammo bu hammasi emas … Yetib kelganidan keyin «salbiy» javobni olgan o‘yinchilar saralash o‘yinlariga kirish uchun bugun koronavirusga qarshi yana qayta test topshirishadi. Keyingi haftadan boshlab esa bahslar boshlanadi. Umid qilamanki, hamma tahlillarim «salbiy» bo‘ladi va dushanba kuni kortga chiqaman. Uzoq tanaffusdan so‘ng yana faoliyatimni davom ettiraman!», – dedi Denis Istomin.