«Liverpul» va «Manchester Yunayted»ning bir kunda mos ravishda 2:7 va 1:6 hisobidagi mag‘lubiyatlari solishtirilar ekan, qaysi biri og‘riqliroq, degan savolga bir fikr juda yoqdi.

Klopp jamoasining mag‘lubiyati og‘riqliroq, keyingi ta’siri xavfliroq, davomi bor. Gap bu yerda "Aston Villa" kuchsizroq ekanidan yo "MYU" bir kishi kam o‘ynaganidan emas, boshqa.

«Yunayted»ning muammolari shundog‘am ma’lum edi. Maguayrning yomon formasi, Shouning darajasi, De Xeaning qutqarmayotgani, Pogba va boshqalar - bu kamchiliklar yig‘ilib, 1:6 ni yasashi hayron qolarli holat emas. Shundog‘am, "MYU" chempionlikka da’vogar emas, to‘rtlik uchun kurashda hali hammasi oldinda, o‘tgan yili hatto 8-o‘rinda yurib ham, yaxshi seriya qilib, uchlikka chiqish imkonini ko‘rdik. Tushunarli.

«Liverpul» uchun esa, bu mag‘lubiyat katta voqea. Jamoa o‘zini yengilmas, mukammal sifatida namoyon qilayotgandi, raqiblar o‘yindan oldinoq, imkoniyat yo‘qligini bilib tushishar, har qanday holatdayam, baribir oxirigacha «Liverpul» g‘alaba qozonishiga hamma ishonardi. Bu jamoaga qo‘shimcha ustunlik berardiki, endi, mana shu faktor yo‘qoldi. Birmingemliklar shunchaki, omad tufayli emas, aynan taktik qopqonlar, o‘ng qanot himoyasidagi bo‘shliqlarni topib, jazoladi. Liverpulni yutishmas, yengish ham mumkinligini dunyoga namoyon qildi.

Ikki yil oldin Angliyada «Manchester Siti» ham shunaqa maqomda edi. Keyin Klopp ularni yirik hisobda yengdi, yana yengdi, natijada «Siti» ham oddiy jamoaga aylanib qoldi.

«Biz "Siti"ning kamchiligini bilardik - ularni to‘psiz qolganda jazolash mumkin» - bu Brendon Rojersning 5:2 g‘alabadan keyingi so‘zlari.

«Lester» Gvardiola jamoasining pressingga mubtalo ekanidan foydalandi. Ko‘pchilik bo‘lib, to‘p uchun talashishga undab, uzun paslar bilan jazoladi.

«Aston Villa» esa, himoyada u qadar kuchli bo‘lmagan Trent va o‘sha qanotda ortga uncha qaytmaydigan Salohdan foyda chiqardi. O‘sha zonalarga urg‘u berish orqali, vaziyatlar yaratdi.

«Yunayted»ning mag‘lubiyati yangi biror xulosaga sabab bo‘lolmaydi, ammo «Liverpul»ning «axill tovoni» ko‘rinib qoldi. Har holda, mukammal jamoa 7 ta qo‘yib yubormaydi.

Qahramon Aslanov.