Ukraina terma jamoasi bosh murabbiyi Andrey Shevchenko Fransiya terma jamoasiga qarshi o‘yin bekor qilinishi kerak degan fikrda emas.

"O‘yinni bekor qilish kerak edi deb o‘ylamayman. UYEFA va FIFA futbolni davom ettirish uchun katta kuch sarflayapti. O‘yinni bekor qilishning oqibati yomon bo‘lishi mumkin edi. Biz katta yo‘qotishlarga duch keldik.

Jahon chempionlariga qarshi asosiy futbolchilarimizsiz o‘ynash aytarli imkoniyatsiz. Tarkibimizda 1-2 nafar asosiy futbolchi yo‘q bo‘lsa, o‘yin sifatimizga salbiy ta’sir ko‘rsatadi. Biz bo‘lsa asosiy tarkibning 7-8 nafar futbolchisini yo‘qotgandik. Shu sababli, 18-19 yoshli futbolchilarga o‘ynash imkoniyatini berdik. Biz butun vaziyatni tushundik va tavakkal qildik. Umid qilamanki, bunday yaxshi raqib bilan o‘ynash yigitlar uchun tajriba ortirishga yaxshi bo‘ldi. Futbolchilar bunday raqibga qarshi maydonda qanday harakat qilish kerakligi, qanday xatolarga yo‘l qo‘ymaslik kerakligini tushunib oldi.

Biz terma jamoada tashkil etayotgan tuzilmaviy o‘yinimizni namoyish eta oldik. Yo‘lga qo‘yilgan xatolar esa yigitlar to‘plagan tajribadir. Biz o‘yinni tahlil qildik, ko‘rsatdik va bunda ijobiy yutuq borligini aytdik. Agar siz bunday raqib bilan o‘ynamasangiz, xato qilmasangiz, u holda o‘sishga erishmaysiz. Ukraina chempionati ayni paytda bizga hech narsa bermayapti. U yerda hech qanday ritm yo‘q, sifatli futbolchilar yo‘q. Ukraina chempionatida nimagadir erishish juda qiyin, shu sababli, futbolchilarni mana shunday raqiblarga qarshi o‘yin orqali o‘stirmoqchimiz va shundagina natija bo‘lishiga ishonmoqdamiz. To‘g‘ri, biz o‘z imijimizga zarar yetkazdik, chunki, 7:1 hisobida juda yirik", - dedi Shevchenko.