Pro liganing 12-turida Farg‘onaning ikki jamoasi "Neftchi" hamda "Istiqlol" to‘qnash kelishdi.
Uchrashuv maydon egalarining hujumlari bilan boshlandi. Ushbu hujumlarning birida esa to‘p himoyachi Jamshid Qobulovga kelib tushdi. Bu vaziyatda futbolchi ikkilanmay, chamasi 35 metrlardan darvoza tomon kuchli zarba berdi. Pastdan yo‘naltirilgan to‘pni "Istiqlol" darvozaboni qaytarishga ojiz bo‘ldi va o‘yindagi hisob ochildi — 1:0. Keyinchalik o‘yin surati tenglashdi va jamoalar ketma-ket xavfli vaziyatlarni yuzaga keltirishdi.
Ikkinchi bo‘limda "Istiqlol" jamoasidan albatta kuchaytirilgan o‘yinni namoyish qilishlarini kutgan muxlislar bunga guvoh bo‘lishdi. Ular tomonidan uyushtirilgan bir qancha xavfli hujumlar hisobni o‘zgarishiga olib kelishi ham mumkin edi. Lekin, bugun omad neftchilar tomonida bo‘ldi.
"Neftchi" uchun ancha og‘ir kechayotgan ikkinchi bo‘limning 86-daqiqasiga kelib tajribali futbolchi Mansur Saidov tomonidan uzatib berilgan to‘pga birinchi bo‘lib yuqori tezlikka ega bo‘lgan hujumchi Dostonbek Toshmatov yetib bordi va mehmonlarning himoyachilaridan o‘zib ketib, ikkinchi golni chiroyli tarzda kiritishga muvaffaq bo‘ldi — 2:0.
O‘yin tugashiga fursat oz qolishiga qaramay mehmonlar oldinga intilishda davom etishdi va qator xavfli vaziyatlarni yaratishga ham ulgurishdi. Ammo, mahorat va tajriba bobida ustunlikka ega "Neftchi" jamoasi yakunda muhim g‘alabani qo‘lga kiritdi.
Pro liga
"Neftchi" - "Istiqlol" - 2:0
Hakamlar: G‘ayrat Jo‘rayev, Anvar Marajabov, Ziyodulla Abdurahmonov
Nazoratchi: Baxtiyor Togayev
Komissar: Zohir Akramxonov
Gollar: Jamshid Qobulov, 12 (1:0), Dostonbek Toshmatov, 85 (2:0)
“Neftchi”: Sherzodbek Abduraimov, Islombek Karimov (Mansurjon Saidov, 58), Otabek Zokirov (Sanjarbek Zokirov, 88), Islomjon Toshpo‘latov (Jamshidbek To‘raqulov, 88), Jamshid Qobulov, Doston Avazbekov (Dostonbek Toshmatov, 46), Rustamjon Abduhamidov, Umar Adhamzoda, Shodiyor Xojimatov, Sirojiddin Allayev, Anvarjon Xojimirzayev (Pavel Smolyachenko, 58)
“Istiqlol”: Xurshid Xodjayev, Axrorbek O‘ktamov, Firdavs Asadov (Oqiblbek Mahmudov, 46), Jasurbek Ermamatov (Shohrux Boyqo‘ziyev, 46), Abduholiq Qurbonov, Sardor Sotvoldiyev, Ulug‘bek Xudayberdiyev, Temur Mamatmurodov (Riza Ayvazov, 73), Xushnudbek Bozorov (Sanjar Baratov, 46), Elyor Mamasoliyev, Ma’ruf Jumayev (Davronbek Isoqov, 62)
Ogohlantirishlar: Islomjon Toshpo‘latov, 32, Shodiyor Xojimatov, 63, Pavel Smolyachenko, 89 – Yo‘q.
