Superliganing 17-tur qoldirilgan o‘yinida "Paxtakor" Toshkentda "So‘g‘diyona"ni qabul qiladi.

Chempionlik sari dadil qadamlarini tashlayotgan "Paxtakor" Chempionlar Ligasidagi ishtiroki sababli kechiktirilgan bellashuvda maydonga tushadi. Arveladze jamoasi birinchi davrada Jizzaxda imkoniyatni boy bergandi. Shu sababli mazkur bahsning keskin kechishini kutish mumkin. Jamoalar safida diskvalifikasiya bilan bog‘liq yo‘qotishlar mavjud emas.

Milliy chempionatlar doirasida o‘zaro 49 uchrashuv bo‘lib o‘tgan. 40 bellashuvda jamoamiz g‘alabaga erishgan bo‘lsa, 4ta o‘yinda durang qayd etilgan va 5 bahsda raqibning g‘alabasi qayd etilgan. 123 gol urgan "Sherlar" o‘z darvozasidan 39 to‘p o‘tkazib yuborishgan. "Paxtakor"ning eng yirik g‘alabalari 6:1 va 5:0 hisoblarida kuzatilgan.

Toshkentdagi 24 bahsning 22tasida "Paxtakor" muvaffaqiyatini nishonlagan. Shundan 12 g‘alaba yirik natija bilan qo‘lga kiritilgan. O‘z maydonida paxtakorchilar 88 gol urib, 18 to‘p o‘tkazib yuborgan. Faqat bir martadan jizzaxliklar yutug‘i va durang qayd etilgan. 1995 yildan beri "So‘g‘diyona" safar o‘yinlarida ochko olmagan.

"Paxtakor" va "So‘g‘diyona" jamoalari o‘rtasidagi o‘yin 21 oktyabr, chorshanba kuni soat 16:00da "Paxtakor" stadionida boshlanadi.