Kecha Yevropaning kuchli beshlik chempionatlarida turning asosiy bahslari yakunlandi. Muxlislar bir biridan qiziq va shiddatli uchrashuvlar guvohiga aylanishdi. Biroz oldinroq, haftaning o‘rtasida bo‘lib o‘tgan YECHL bahslari va keyinchalik dam olish kungi dasturlarni bezab bergan tur o‘yinlari bir qancha kutilmagan holatlar va faktlar, qayta yangilangan rekordlar va statistikalar bilan yodda qoldi, biz esa ularning asosiylariga to‘xtalib o‘tamiz, e’tiborga molik raqamlar diqqat markazimizda.
75
Chempionlar Ligasining "G" guruhi joriy mavsum barchaning diqqat markazida. Muxlislar Ronaldu va Messi qarama-qarshiligi qaytganidan xursandlar. Lekin 1-tur doirasida guruhdagi boshqa bir duel sodir bo‘ldi: ustoz va shogird janggi. Kiyevning "Dinamo" klubi bosh murabbiyi Mircha Lucheskuning Pirloga qarshi bahsi anchayin prinsipialligi bilan ajralib turar edi. Lekin ruminiyalik murabbiy o‘z shogirdlarini "Olimpiko" stadioniga boshlab tushgan oqshom boshqa bir jihati bilan musobaqa tarixidan joy oldi. Qiziq tomoni, 75 yosh-u 84 kunlik mutaxassisning o‘sha uchrashuvdan so‘ng eng keksa murabbiyga aylangani va Yupp Xaynkesning (73 yosh) 2013 yilgi rekordini yangilagini alohida tahsinga sazovor. Garchi kiyevliklar o‘z maydonlarida "Yuventus"ga imkoniyatni boy berib qo‘ygan bo‘lsalar-da, umumiy o‘yin jihatidan o‘sha kuni yomon taassurot qoldirishmadi. Guruh grandlarining ichki muammolari tur o‘yinlarida borgan sari jiddiy tus olayotganidan kelib chiqsak, "oq-ko‘klar" keyingi bosqich masalasini hal etish uchun yaxshgina imkoniyatga egalar.
23.
Dam olish kunlari efirga uzatilgan bahslar ichida eng ommabop shou shubhasiz, "El Klasiko" edi. Yuqori intriga ostida kechgan uchrashuvda kutilganidek, tajribali futbolchilar katta sahnaga chiqishdi. "Real Madrid"ning so‘nggi paytlardagi o‘yinlarida asosiy xaloskorga aylanib borayotgan Ramos "Kamp Nou"da rosmana liderlik xususiyatini namoyish eta oldi. Jamoasini har tomonlama nazoratda ushlab turgan sardor shuningdek, o‘yinda bitta penaltini aniq ijro etib, gol urishga ham erishdi. E’tiborga molik jihati, ushbu 11 metrlik nuqta ispaniyalik uchun klub va terma jamoa safidagi umumiy 23-si edi. Shunday qilib Serxio "Klasiko"larda penalti tepgan so‘nggi 13 yil ichidagi birinchi futbolchiga aylanib oldi. Lekin Ramosning "qaymoqranglilar" safidagi roli qanchalik yuqori bo‘lmasin, jarima zarbalarini ijro etuvchi stabil hujumchiga ega bo‘lmagan Zidan shogirdlarining keyingi o‘yinlardagi g‘alabali seriyalariga hech kim kafolat bera olmaydi.
16
"Barselona"ga qanday murabbiy kelishidan qat’i nazar Messining jamoada o‘z o‘rni bor va bu allaqachon o‘zgarmas jarayonga aylanib ulgurgan. Argentinalik yulduzning garchi La Ligadagi ishlari unchalik ham yurishmayotgan bo‘lsa-da, u Chempionlar Ligasida gol urishni hali beri unutib qo‘ygani yo‘q. "Ferensvarosh"ga qarshi bahsda hisobni ochgan Leo ushbu goli bilan musobaqa davomida ketma-ket 16 mavsumdan beri gol urib kelayotgan ilk futbolchiga aylandi. Olti karra "Oltin to‘p" sohibining o‘yin darajasida biroz pastlash holatlari kuzatilayotgan bo‘lsa-da, Messida jamoasini yetaklab yurish uchun hali kuch yetarli. Klub tarkibidan yetishib chiqayotgan yosh futbolchilar uchun Leoning xalqaro maydonlarda erishayotgan yutuqlari haqiqiy dasturilamal vazifasini o‘tab kelmoqda.
13
Shanba kunidagi uchrashuvlar orasidan "Venlo" hamda "Ayaks" qarama-qarshiligi ham o‘rin olgan edi. Nomlar jihatidan unchalik e’tiborni tortmaydigan ushbu bahs o‘ta kutilmagan natija bilan yakuniga yetdi - 0:13. To‘g‘ri, amsterdamliklar shubhasiz, mamlakatning eng bayroqdor jamoasi. Lekin hisobning bu qadar yiriklashib ketishiyu, raqibning o‘yinga yetarlicha tayyor holatda emasligini mehmonlarning o‘zi ham kutishmagan bo‘lsalar kerak. Nima bo‘lgan taqdirda ham, ushbu yirik hisobdan so‘ng "Ayaks" o‘zining erediviziyadagi 65 yillik rekordini yangilashga erishdi. Uchrashuvda shuningdek, "De Toekomst"ning yosh avlodi katta sahnaga chiqdi. Umidli talantlardan biri deya e’tirof etilayotgan Lassana Traore kutilmaganda penta-trik qayd etib, hozirdanoq katta qiziqishlarga sabab bo‘lmoqda. Xullas, Ten Xagda bundan buyog‘iga tanlovlar bisyor. Traore singari iste’dodlar hali "Ayaks"ga YECHL da ko‘p asqatadi.
10
Levandovskini joriy mavsum ham to‘xtatib qolishning iloji bo‘lmayapti. O‘tgan mavsum berilishi kerak bo‘lgan barcha shaxsiy sovrinlarga yaqqol da’vogar sanalan polshalik forvard bu yili barchasini chinakamiga yutib olishga jiddiy bel bog‘lagan. Bundesliganing yakuniga yetgan 5 ta bahsida allaqachon 10 ta golni o‘z hisobiga yozib ulgurgan Robertning mehnati haqiqatan ham tahsinga sazovor. U va uning jamoadoshlari xuddi shu turnir doirasida umumiy hisobda 22 bor raqib darvozasini ishg‘ol etishgan bo‘lib, bu musobaqaning total rekordi hisoblanadi. Mayli, Levandovskiga turli omillar va’jidan balki, "Oltin to‘p" ham berilmasligi mumkin, lekin unga buning katta ahamiyati yo‘q. Muhimi u gollarini istalgan yerdan topib ketaveradi, muxlislariga chiroyli o‘yinini ko‘rsatishdan sira to‘xtab qolmaydi. Balki, Yevropada urilgan gollar miqdorini o‘tkazilgan o‘yinlar soniga nisbatda hisoblash payti kelgandir. Yana kim biladi deysiz.
10
Chempionlar Ligasining nisbatan kutilmagan natijalaridan biri "Park de Prens" arenasida kuzatildi. Maydon egalarining "MYU"ga imkoniyatni boy berib qo‘ygani ancha-muncha muhokamalarga sabab bo‘lmoqda. Lekin bu yerda asosiy gap parijliklarning kutilmagan mag‘lubiyatida ham emas(buning sabablarini turlicha izohlash mumkin), balki manchesterliklarning safarda g‘alabaga erishganliklarida. Sulsher shogirdlari o‘zlari uchun o‘ta qiyin bahsni maksimal darajada hal etganlari holda barcha musobaqalardagi ketma-ket 10-g‘alabaga imzo chekishdi. Ushbu natija hatto, Aleks Fergyuson davrida ham sodir etilmagan bo‘lib, klub rekordiga aylandi. Garchi mankunyanlarning joriy mavsumdagi ahvoli havas qilarli darajada bo‘lmasada, jamoa shunga o‘xshash kichik rekordlar bilan muxlislarini ovutib kelyapti.
3
Chempionlar Ligasining eng kutilmagan natijasi Madridda sodir bo‘ldi. Jamoaga Zidan qaytarilgach ham xalqaro maydonlarda deyarli ishi yurishmayotgan "Real" bu safar "Shaxtyor" to‘sig‘idan o‘ta olmadi. Eng qiziq tomoni, uchrashuvning ikkinchi bo‘limiga kelib tabloda 0:3 hisobi porlab turar edi. "Los Blankos"ning 3 ta to‘p farqi bilan ortda borishi kamdan kam uchraydigan holatlardan biri sanalib, ushbu "sovuq" natija orqali klub o‘zining 1999 yilgi noxush an’anasini qayta takrorladi. Shuningdek, "qaymoqranglilar" bu paytgacha hali biror marta YECHLning ochilish o‘yinida mag‘lubiyatga uchramagan edilar.
47
Barcha kuchli beshlik chempionatlari turli xil kutilmagan natijalar bilan muxlislarni hayron qoldirishda davom etmoqda. Turnir jadvalidagi yangi holatlar, yetakchilarning ketma-ket ochko yo‘qotishlari, autsayderlarning kutilmagan kombeklari va boshqa jarayonlarni kuzata turib joriy mavsum pragnozlarini taxmin qilish qiyin bo‘lib qolganligini anglab yetamiz, ayniqsa Premyer Liga. Unda qayd etilayotgan yirik hisoblar tobora ko‘payib ketmoqdaki, muxlislar endi bunga ajablanmay ham qo‘yishdi. Lekin o‘tgan dushanba oqshomida butunlay bunga teskari bo‘lgan holat kuzatildi. G‘arbiy Londonda kechgan "Vest Bromvich" hamda "Byornli" bahsida har ikkala jamoa futbolchilariga ham hisobni ochish nasib etmadi. Shu tariqa APLda ushbu quruq natija qayd etilishi uchun naq 47 ta o‘yin kerak bo‘ldi. Lekin klublar bundayin yuqori tempda davom etadigan bo‘lishsa, bunday natijalarning qayta takrorlanish ehtimoli ham pasayib boraveradi.
YUSUFBEK tayyorladi
