Pro liga birinchi bosqichi 2-davrasining so‘nggi 14-turi doirasidagi «Oqtepa» - «Istiqlol» uchrashuvi nihoyasiga yetdi. O‘yinda mehmonlar 1:2 hisobida g‘alaba qozonganiga qaramay, turnir jadvalida 5-o‘rinda qoldi.

Natijada «Dinamo» jamoasi «Istiqlol»ni 5ta to‘p farqi bilan ortda qoldirib, 4-o‘rinni egalladi. Demak, Superliga yakuniy bosqichida «Neftchi», «Sho‘rtan», «Turon» va «Dinamo» yo‘llanma uchun kurash olib boradi. Ushbu jamoalar o‘rtasidagi o‘yinlar taqvimi tez orada aniqlanadi. Bahslar noyabr oyida o‘tkazilishi rejalashtirilgan. Turnir jadvalida 1-2-davrada yig‘ilgan ochkolar saqlab qolinadi.

Ma’lumot uchun, Pro liga yakuniy bosqichda yuqoridagi to‘rt jamoa uy-safar tizimida o‘zaro jami 6 tur o‘tkazib, 1-o‘rinni olgan jamoa Superligaga to‘g‘ridan-to‘g‘ri yo‘llanmani qo‘lga kiritadi. 2-o‘rin sohibi esa Superligada 13-o‘rinni egallagan jamoaga qarshi o‘z uyida bitta o‘yindan iborat pley-off bahsida maydonga tushadi.