Angliyaning «Manchester Yunayted» klubi sobiq murabbiyi Rene Melensten jamoa yarim himoyachisi Pol Pogba haqida fikr bildirdi. U Pogbani top-futbolchi sifatida hisoblamasligini yashirmadi.
«Siz xohlaganingizcha iste’dodli bo‘lishingiz mumkin, lekin, asosiysi – har doim mehnat qilish kerak. Faqat mehnatdan keyin futbolchining fazilatlari namoyon bo‘ladi. O‘ylaymanki, Pogba unchalik ham mehnat qilishni xohlamayapti. Bu sezilmoqda. U juda sekin harakat qilmoqda, raqiblar esa bundan unumli foydalanmoqda.
Pogba shubhasiz iqtidorli futbolchi. Ko‘pchilik uni jahon saviyasidagi futbolchi deb hisoblaydi. Lekin men bunday demagan bo‘lardim. Bunday nomga kimlar loyiq ekanligini men juda yaxshi bilaman. Pogba o‘zidan kutilgan natijani qayd eta olmayapti», - dedi Melensten Stadium Astro bilan suhbatda.
Eslatib o‘tamiz, Melensten 2001-2006 yillar davomida "MYU"ning 18 va 21 yoshgacha bo‘lgan futbolchilariga ustozlik qilgan. Shuningdek, 2007-2013 yilgacha asosiy jamoada yordamchi murabbiy bo‘lib faoliyat ko‘rsatgan.
