Stadion.uz «Manchester Siti» himoyachisi Kayl Uoker borasida fikr almashadi.

Uokerni ishonchli himoyachi deb bo‘lmaydi. So‘zlarimizni «Siti»ning yangi davri boshlanganidan beri kuzatib kelayotgan muxlislar yaxshi biladi, ammo...

Aslida, Uoker katta futbolga kichik bo‘yli himoyachi sifatida kirib kelgan. Aynan shu pozisiyada «Sheffild Yunayted» sharafini himoya qilgan. Uni ko‘pchilik Jermeyn Defo yoki Kevin Fillipsga ham o‘xshatib yuborar edi desak, adashmagan bo‘lamiz. Kayl tezlik bobida tengsiz o‘spirin edi, biroq vaziyatlardan foydalanishda juda ham oqsagan. Bu holat «Sheffild»ning yoshlar jamoasidagi qanot himoyachisi jarohat olmaguniga qadar davom etdi. «Nottingem Forrest»ga qarshi bahsdan so‘ng, Kaylning butun boshli faoliyati o‘zgarib ketdi.

"O‘sha bahs oldidan murabbiy raqibning eng kuchli futbolchisi qanotda to‘p surishini aytdi. Uning ustun tomoni tezligida edi. Shu bois, murabbiy meni undanda tezroq harakat qilishimni talab qildi. Bu vazifani uddaladim. O‘sha voqeadan beri o‘ng qanot himoyasida to‘p surib kelyapman.

Uoker ikki barobar tezroq yo‘nadigan olov

Futbolchi uchun tezlik juda muhim omil. Ayniqsa, bugungi kundagi «Siti» uchun bu juda muhim omil. Kompaniy, Silvalar ketgach, jamoaning o‘yin tezligi biroz pasaydi. Endi esa, jamoa g‘oyasini to‘liq o‘ziga singdirgan Fernandino ham jomadonlarini yig‘ishtirishga tushib ketgan.

Umuman olganda, Uokerning arsenali boy emas, biroq shunga qaramay YECHL va APL musobaqasida u istagan vingerlarini to‘xtatib qolishni uddalamoqda.

Ba’zida, Kayl o‘yinga shu qadar berilib ketadiki, hatto uni telba deb ham o‘ylab qolishingiz mumkin. Avgust oyidagi «Real Madrid»ga qarshi uchrashuvni eslang! Raqib qay darajada yuqori salohiyatli bo‘lmasin, u butun o‘yin davomida qanotda hokimlik qilgan edi. Shunday bo‘lsada, Kayl har doim ham bu qadar jismonan baquvvat va tezkor bo‘lmagan.

«Men juda yosh edim. O‘smirlik paytlarimda bo‘yim 162 sm edi. Men jamoamizdagi eng past bo‘yli futbolchi edim. Shu bois, qolganlardan ko‘ra ko‘proq mashg‘ulot o‘tkazar, jismoniy imkoniyatlarimni yaxshilash haqida bosh qotirishga majbur edim. Hech qachon »Sheffild« jamoasi akademiyasi direktori Ron Ridning so‘zlarini unutmayman. U menga ikki hafta davomida katta tarelkada ovqatlanishni buyurdi. Keyin tekshirib ko‘ramiz dedi. Men bir necha hafta uning oddiygina ko‘rsatmasiga rioya qildim. Oqibatda, bo‘yim keskin o‘sishni boshladim. Balki, Ronning ko‘rsatmasida hech qanday ajiblik yo‘qdir, biroq menga bu ta’sir qilgandek edi go‘yo»

Uoker o‘z faoliyatini «Bremeel Leyn»da yakunlashni orzu qiladi, ammo hozir bu haqida bosh qotirish vaqti emas. E’tiborlisi shundaki, Kayl o‘tgan dam olish kuni sevimli jamoasi darvozasini ishg‘ol qildi. Bu uning juda uzoq tanaffusdan so‘ng kiritgan goli edi.

Himoyachi ayni damda nafaqat tezlik, balki universallik borasida ham ancha o‘sishga erishgan. Uning maydondagi foydali harakatlari haqida fikr bildirgan «Sky Sports» nashri quyidagi so‘zlarni keltiradi:

«"Siti" qimmat o‘ng qanot himoyachilarini sotib olishda davom etmoqda, biroq hech biri Kayl singari futbol namoyish eta olmaydi»

Buyuklik sari yagona yo‘l bor, ammo u juda og‘riqli

Kayl haqida so‘z ochilgan ekan, uning ayrim kamchiliklari haqida fikr bildirib o‘tish adolatdan bo‘ladi. Ko‘pincha unga nimadir yetishmayotgandek tuyuladi. To‘g‘ri, u super fulbek, biroq unda ishonchli o‘yinlar seriyasi juda kam. O‘z vaqtida Rednapp, Pochetino singari murabbiylar e’tiborini tortgan, terma jamoadan chaqiruv olgan yigit Pepni ham e’tiborsiz qolishiga yo‘l qoldirmadi. Shunday bo‘lsada, stabillik borasida Kayl biroz oqsashi bor gap.

Pochettino Kaylning «Siti»ga o‘tmoqchi ekanligidan xabar topgach, oav orqali keskin so‘zlar bilan chiqish qilgani yodingizdami?

«Biz "Tottenhem"da Kaylning nimalarga qodir ekanligini ko‘rib bo‘ldik. Bu uning maksimum imkoniyati.»

Maurisio o‘zining avtobiografiyasi haqidagi kitobda Kaylning jamoadan ketishiga uning Kiran Trippega raqobatni boy berayotgani sabab bo‘lganini aytadi. Murabbiy bejizga Kaylning qarorini keskin qabul qilmagan. Sababi, himoyachi mavsum yakunlanishiga bir yarim oy qolganidagina «Siti»ga o‘tmoqchi ekanligimi ma’lum qilgan. Bu paytda esa, «shporlar» chempionlik uchun kurash olib borayotgan edi.

Ko‘p o‘tmay, Uoker «shaharliklar» safiga yo‘l oldi. Pochettino esa, APL chempionligidan quruq qoldi. Vaqt o‘tib ular o‘rtasidagi gina-kudratlar ko‘tarildi. Hozir hammasi o‘z o‘rnida.

Shu o‘rinda, Uokerning yangi darajaga chiqishida «Tottenhem» sobiq ustozining o‘rni beqiyos ekanligini aytib o‘tish lozim. Sababi, aynan Maurisio Kayldan ovqatlanish tartibga amal qilishini talab qilgan va uning jismoniy imkoniyatlarini professional darajaga olib chiqqan edi. Bu omil esa, yakunda «Siti»ga juda qo‘l keldi. Sababi, Kayl «shaharliklar» safida 5 yildan beri birorta jarohat olgani yo‘q! U o‘zining 30 yoshida ham tezligini yo‘qotmadi va tobora tajriba to‘plab bormoqda. Katta ehtimol bilan aynan Kayl Shayx Mansur erasidagi eng yaxshi himoyachi! U o‘ziga sarf etilgan 50 millioni ortig‘i bilan oqlashda davom etmoqda.

Tan olish lozim, «Tottenhem» qanot himoyachisi uchun «shaharliklar» 52,7 million yevrodan voz kechganida, ko‘pchilik hayron qolgan edi. Boz ustiga, o‘sha yozda Neymar ham Parijga 222 million yevro evaziga ko‘chib o‘tgan edi. Muxlislar transfer bozoridagi inqilob sababli Uokerni «Siti» juda qimmatga qo‘lga kiritdi deb hisoblagani rost. Ingliz nashrlari Kaylni negadir to‘pni o‘z vaqtida yetkazib bermaslikda ayblashadi. Shaxsan Garri Lineker uning transferi haqida quyidagicha fikrda:

"Kayl Uoker dunyoning eng qimmat himoyachisiga aylanmoqda. Agar u o‘z vaqtida to‘pdan qutilish bobida ham kuchli bo‘lganida, transfer summasi necha pul bo‘lishi mumkinligini tasavvur qilyapsizmi?"

Ingliz nashrlarini o‘qisangiz...

Kayl hali-hamon Angliya terma jamoasi uchun muhim futbolchi bolishi mumkin. Hatto Kiran va Trend tarkibda bo‘lishiga qaramay. Sababi, Kayl ortiqcha muammosiz markaziy himoyada ham ko‘rinish berishi mumkin. Sheffildlik futbolchi Sautgeyt uchun zaxira quroli sifatida istalgan daqiqada qo‘l kelishi mumkin. Afsuski, Kaylning engil ayollar bilan karantin qoidalarini buzgani sababli murabbiy uni termaga boshqa chaqirmasligini rasman e’lon qilib bo‘ldi. Shunga qaramay, Uoker Garrini o‘z fikridan qaytarishga urinib ko‘rishi aniq. Hech bo‘lmasa, maydondagi o‘yinlari bilan yana bir bor Sautgeytni o‘ylab ko‘rishga majbur qilish mumkin.

Shu o‘rinda qiziq bir faktga e’tibor bering! «Siti» Uokerni xarid qilgach, negadir deyarli har mavsum o‘ng qanot himoyachilarini sotib olyapti va ularning barchasi raqobatda qahramonimizga yengilmoqda. Daniloga Uoker «non bermagach», navbat Konseluga keldi. Balki, yozda ro‘yxatdagi futbolchilar soni yana ortar?!

«Mening otam hech qachon meni o‘zi ustidan g‘alaba qozonishimga imkoniyat bermagan. Hatto qarta o‘ynaganimizda ham menga yutqazib bermagan. Balki, shu bois hayotda kurashuvchan inson bo‘lib ulg‘aygandirman. Otamning bergan saboq men uchun hayotim davomida ko‘p bor qo‘l kelgani rost. Endi men ham o‘z farzandlarimga meni mag‘lub etishlariga yo‘l qo‘ymayman.»

Endi e’tiboringizga Uokerning qanot bo‘ylab qay darajada erkin harakat qilishini issiqlik kartasida namoyish etamiz. E’tibor qarating, so‘nggi ikki mavsum davomida kuchli beshlikdagi birorta futbolchi Kayl singari mehnat qilmagani aniq. Deyarli butun qanotni bir o‘zi berkitishga qodir futbolchi sifatida Uoker Gvardiolaning qanotdagi asosiy kuchiga aylanib bormoqda.

Afsuski, uning mehnatkashligi har doim ham eng kuchli bo‘lishga imkon bermaydi. «Sky Sport» eksperti Garri Nevill Ukoyerni ikki og‘iz so‘z bilan osmondan pastga olib tushib qo‘ydi:

"Kayl tez-tez o‘yindan tushib qoladi. Agar to‘p qarama qarshi tomonda bo‘lsa, biz uni deyarli harakatsiz ahvolda ekanligini darrov anglashimiz mumkin. Shu bois ham uni sayyoramizning eng ishonchli himoyachisi deb bo‘lmaydi."

Shunga qaramay, Kayl so‘nggi mavsumlarda futbolchi sifatida o‘sishga erishgani rost. Afsuski, unda jamoadoshlari Jezuz, Stounz, Otamendilar singari stabillik mavjud emas. Pep uchun bu masala kun tartibidagi asosiysi bo‘lib turgan bo‘lsa, ajab emas.

Uokerning transferi «Siti» uchun chinakam foyda bo‘ldi desak, adashmagan bo‘lamiz. Sababi, bir nechta frontda kurash olib boruvchi klub uchun kerakli kadrni topish va undan unumli foydalanish juda muhim. Kayl jamoa istagan barcha narsani bermoqda, shu bois klub u singari mehnatkash chap qanot himoyachisini sotib olish orzusida. Stabillik yetishmasligi bor gap, biroq u katta yo‘lni bosib o‘tgan chinakam «jangchi». Bu e’tirofni undan tortib olishga hech kimning haqqi yo‘q.