Germaniya futbol ittifoqi rahbariyati mamlakat bosh jamoasiga yangi bosh murabbiy izlash ishlarini boshlab yubordi.

Kecha Germaniya Ispaniya (0:6) terma jamoasiga yirik hisobda mag‘lub bo‘ldi va Millatlar Ligasining yarim final bosqichiga chiqa olmadi. Ushbu natija terma jamoaning rasmiy o‘yinlaridagi eng yirik mag‘lubiyati bo‘ldi.

Sport Bild nashrining tarqatgan ma’lumotiga qaraganda, Germaniya futbol ittifoqt rahbariyati Myunxenning «Bavariya» klubi bosh murabbiyi Xans-Diter Flikning xizmatlariga qiziqish bildirmoqda. Agar Yoaxim Lev keyingi yilning yozida iste’foga chiqariladigan bo‘lsa, u holda uning o‘rniga Flikni olib kelishga harakati boshlanadi.

Qayd etilishicha, "Bavariya" rahbariyati David Alaba va Jerom Boatenglarning keyingi yilning yozida jamoani tark etishi haqidagi Flikning qaroridan norozi bo‘lmoqda.

Bu ikki futbolchining ham kelasi yili yozda shartnomasi yakunlanadi va ular bilan bosh murabbiyning qaroriga asosan shartnoma uzaytirilmaydigan bo‘ldi.